سكوت مش هانعمل حاجه

الكلمه ايد الكلمه رجل الكلمه باب

الكلمه نجمة كهربيه في الضباب

الكلمه كوبري للصلح فوق نهر العذاب

الجن يا أحباب ما يقدر يهدمه

ما أحلي الكلام

وما أعظمه

ما ألزمه

في البدء كانت كلمه الرب الاله خلقت حياه والخلق منها .

أتعلموا .....فاتكلموا

الأغنيه : محمد منير

الكلمات :صلاح جاهين

أنا من رايي الشخصي ان شعب زي شعبنا العربي خساره فيه نعمه الكلام .

قلي ليه يأبو الأنوار اقلك احنا شعب بطبعه طق حنك زي اخوانا الشوام ما بيقولوا علي سبيل المثال لا الحصر عندك اشاعه الميه الملوثه اياها انشرت ازاي ماهو شعبنا الذيذ المحب للكلام زي عنيه .

مثال تاني العباره اللي غرقت قلي عملنا ايه غير الصويت واللطم ولااي فعل طيب فين حبيبنا ممدوح _مالك العباره_ في السجن لا سمح الله ابدا في بيته معزز مكرم ولا علي باله الناس اللي لسه جثثها في البحر.

أخيرا : وهو الأخطر الرسوم الدنماركيه

عملنا ايه غير الجعجعه والمقاطعه الرهيبه ماهو الموضوع أكبر من كده فين المسلمين اللي المفروض يعرفوا الغرب بالاسلام من خلال العمل باخلاق النبي الكريم صلي الله عليه وسلم وفين اعلامنا الهايف معلش قصدي الهادف ده طبعا غير الاعلام بتاع روبي وهيفا

خلاصه الكلام من كان منكم تكلم فليقل خيرا او ليصمت.....اخرصوا من الاخر