Thursday, May 04, 2006

حدث في مثل هذا الوقت


زي دلوقت من كل سنه بتلقي الشوارع باليل فاضيه والشباب بدل وقفه النواصي قاعد لامم نفسه وسهران يذاكر قال يعني هيخترع الذره مع ان التعليم ده من وحهه نظري الشخصيه افضل وسيله تدمير للبشر في العالم -ده طبعا التعليم المصري- اللي احنا متنيلين فيه وعلي رأي خالد كساب- في الدستور- التعليم كالماء والهواء ......والأنتخابات ملوث تماما بس قدرنا نعمل ايه نقضي اجمل ايام شبابنا نمتحن ونحفظ لحد مايجلنا تخلف يعني مثلا كليه زي كليه الهندسه -اللي هي كليه عملي واخدلي بالك- عمرنا ماشتغلنا بأيدينا اللهم الا في التدريب الصيفي اللي هو احد اشكال العذاب هاتقولي ليه هاقلك لأن كليتي في حلوان حيث التلوث بالأسمنت وجميع انواع مسببات الأحتباس الحراري - الله عالكلام الكبير ده- ودرجه الحراره يدوب 49 قول 50 درجه سليزيوس -مئويه يعني بس قلت أكمل فذلكه- والورش في مكان رائع تقريبا كان مخبأ نووي و قلبوه معامل بعد ما الألمان سابو المبني -أصل الألمان هما اللي بانين الكليه- درجه الحراره بتزيد فيه عشره خماشر درجه كمان اختصر وقول فرن بس لسه التقل ورا حيث ياعم الحاج انت عندك اساسا فرن بجد بتاع ورشه السباكه -سباكه معادن مش صرف صحي يا ناصح- و ورشه الحداده ده غير اللحام بالغاز يعني جو رائع ومساعد جدا علي الابداع ............ابداع أديني جيت عالجرح حيث طبعا انتوا عارفيت ان المهندس في الأصل المفروض فيه الابداع وتشغيل المخ وطبعا نظام تعليمنا الرائع بيخلينا نشغل مخنا عالأخر لدرجه اني خايف ليتحرق من كتر الشغل وطبعا دكاترنا الأعزاء بيساعدونا علي التفكير والابداع لدرجه انك لو سألت المعيد هي المسأله ديه جت منين هيقولك احفظها كده........ و لاعزاء للابداع و ياسلام بقي علي ابداع مشاريع التخرج حدوته تانيه أصل الدكاتره بتنجز وتعمل نفس مشاريع السنه اللي فاتت وياسلام بقي لو جاله جروب متفائل وفاكر ان الدنيا بخير وجايبين فكره جديده عايزين يعملوها يبقي سنه اللي جابوهم سوده الدكتور هايقلهم بطلوا فذلكه قال يعني من العبقريه بتاعتكوا وكلام من اللي بيساعد علي الابداع
المهم انا قرفت من التعليم وعايز اعتزل بس مستحرم الست سنين اللي قضيتهم في الكليه
باخد علي قفايا وعلي رأي واحد صاحبي انتوا متعرفهوش ................. خلاص هبطل علام واسرح ببيض و سميط

9 Comments:

Blogger change destiny said...

هندسة ... ؟ زمل يعني

معلش يا بنتي مقدرة صدقيني

بس لما تتخرجي الحالة مش حتتغير غير للأسوء

نأسف على جرعة الكآبة المركزة

5/05/2006 03:31:00 AM  
Blogger m_elsewedy said...

هندسة؟ يا عينى على هندسة يعنى التعقيد كله

ملحوظة يا ندى
نور ولد مش بنت
:D
وما ينفعش يكون بنت هههههههههه

5/05/2006 06:07:00 PM  
Blogger change destiny said...

ههههه

احم احم

آسفة

5/06/2006 06:05:00 PM  
Blogger NoOR said...

never mind

مفرقتش كتير كلنا في الهم سوا ولد من بنت مفرقتش

5/06/2006 08:14:00 PM  
Blogger قلم جاف said...

جيت ع الوجيعة يا نور ..
كنت ناوي أكتب عن التعليم وسنينه السودة من فتحي سرور للي مش عارف اسمه وبياخد النواب على قد عقلهم ، اللي لا بيهش ولا بينش ولا عارفين له خطة ولا تصور وحتى اسمه مش عارفينه .. ويصدق فيه قول الفاضلة مروى : الصراحة راحة يا روحي .. وانت مبتعرفش!
طبعاً باتكلم على وزير التعليم قبل الجامعي ، أما وزير التعليم العالي فعرف يثبت حضوره بشوية تصريحات - صحيح ما أنزل الله بها من سلطان - بس أكد لنا فيها إنه عايش ، مش زي وزير التعليم (عكس العالي) اللي نص الشعب مش عارف اسمه والنص التاني متأكد إنه (الله يرحمه(..
علمني يا جدع على ذرة ونص!

5/07/2006 10:31:00 PM  
Blogger moro said...

باشمهندس.... لقب يتميز به طلبة الهندسة منذ السنه الإعدادية مساواة بالمعيدين...... و سائقي التاكسي أيضا....
شوف الذوق يا أخي :)

جميل يا نور... بروزت الواقع يا فندم

توقيع
زميل الكفاح الهندسي مورو

5/09/2006 11:51:00 PM  
Blogger NoOR said...

الظاهر ان طلبه هندسه كلهم حاله واحده يا مورو
ربنا معانا يا باشمهندز
اما علي موضوع التاكسي فربنا يسهل ونلاقي تاكس نشتغل عليه

5/10/2006 12:03:00 AM  
Blogger Abdou Basha said...

بكرة بعد ما تخلص..
حتعدي ع الجامعة
وتقول فين أيامك

ده احتمال

..

5/11/2006 12:33:00 PM  
Blogger NoOR said...

معتقدش يا عبده .........بعد اللي شفته فيها ربنا يكرمني وانا ان شاء الله معديش جنبها اساسا

5/11/2006 08:16:00 PM  

Post a Comment

Links to this post:

Create a Link

<< Home