البوسط ده لتاتي
رغم اني مكنتش ناوي اكتب حاجه علي البلوج لغايه ما ربنا يفك أسري و أخلص امتحانات ............................. بس يلا عشان خاطرتاتي .كانت عايزه تعرف مين مؤلف القصيده اللي مكتوبه في البروفيل عندي وبيقيتها.... طبعا طلبات تاتي اوامر.......أي خدمه يا تاتي
بيانات على تذكرة مسجون
أحمد فؤاد نجم
الاسم : صابر
التهمة : مصري
السن : أصغر سن عصري
رغم انسدال الشيب ضفاير ضفايرمن شوشتي لما لتحت خصري
المهنة : وارث عن جدودي والزمان
صنع الحضارة والنضارةوالأمان
البشرة: قمحي
القد : : رمحي
الشعر : أخشن م الدريس
لون العيون : أسود غطيس
الأنف : نافر كالحصان
الفم : ثابت في المكانولما جيت أزحزحه عن مطرحه
كان اللي كان
جهة الميلاد : في أي أوضة مضلمة
تحت السمامن أيّ دار وسط النخيل
مطرح ما يجري النيل
مادام ما يكونش قصر
الحكم : من سبع تلاف سنةوأناراقد سجين
أطحن على ضراسي الحجرمن الضجروابات حزين
ملحوضة : سألني سائل
حبستك طالت وليه ؟
لأني طيّب وابن نكته
وابن ايه
مفيش مخالفة ركبتها ضد القانون
لاني خايف
والقانون سيفه ف ايديه
تسأل عليا المخبرين
في أيّ حين
تسمع وتقهم
قصتي ألف وبيه
الاسم صابرعلى البلا
أيوب حمار
شيل الحمول من قسمتي
والانتظار
أغرق في أنهار العرق
طول النهاروألم همي في المسا
وأرقد عليه
عرفت ليه
أكتوبر 1974
posted by NoOR at 5:23 PM
20 Comments:
الله تحفة يانور و بجد دي أول مرة أقراها مع إني من عشاق أحمد فؤاد نجم
شكراً قووووووووووووي يا نور
وربنا يوفقك و ينجحك يــــــــــــارب
أنا كنت هخاصمك بس كدة بقا سماح
جامدة يا واد يا نور .. على فكرة يا جماعة .. نور ده هو الأب الروحى ليا فى موضوع البلوجز ده .. ربنا ينجحك بقى يابنى .. دا أنا زهقتلك
نور مش عارفة ليه صورة البروفايل بتاعتك بتفكرني بفيلم اللص و الكلاب
بس هي لايقة قوي على القصيدة
تخاصميني ليه بس يا تاتي......ده أنا غلبااان
شكرا قوي يا تاتي
عسويات حبيب قلبي مرحبا بك لأول مره علي البلوج .البلوج نور بيك
شكرا قوي علي حكايه جود فازر دي ..... انت عارف ان الشبه بيني وبين آل باتشينو كبييييييييير
علي فكره يا تاتي أنا عندي سوفت كوبي لمعظم اعمال أحمد فؤاد نجم لو عايزه منها أي حاجه قوليلي
يابني رووح ذاكر يابني
مش عارف اذاكر كل ما اقعد علي ورق المادة الأولانيه اقول ياد لسه قدامك اسبوع بحاله ربنا يستر ومالقيش الامتحان بكره.......ادعولي ربنا يهديني واذاكر
ربنا يهديك يا خويا .. انت متأكد يا نور انه ورق المادة الاولانية .. يا خوفى لتكون بتذاكر فى ورق مادة تانية
هههههههههههههههههههههه
ده احتمال كبير جدا يا عيسوى انه يكون بيقرا فى ورق مادة تانية
نور وعارفينه كويس
اتلم ياد منك له مش عايزين طوله لسان.........انتوا عارفني
آآآآل ورق ماده تانيه آآآآل فاكرني مسطول..............ده ورق السنه الل فاتت ياذكي منك له
هههههههههههههههههههه
كنت حاسس
:P
بقالي مدة مقرتهاش ... نجم كلامه بسيط و بيوصل بسرعة
ربنا معاكم في الامتخانات
ربنا يكرمن في امتخناتنا....يارب
وانتي معنكيش امتخنات ولا ايه النظام
This comment has been removed by a blog administrator.
إمتخانات دى مش غير إمتحانات برضه ؟؟
ايش فهمك انت ........طبعا تفرق
:) عندي و الحالة ض ج خالص
ربنا يستر علينا جميعا عندي بكره امتحان سيوري اوف ماشين ومش فاكر منها اي حاااااااااااجه .........ربنا يوفقك ويوفقنا جميعا
Post a Comment
<< Home