Tuesday, June 20, 2006

أوقات فراغ

منذ وقت بعيد لم اري فيلم احس في ابطاله اني اعرفهم مثل ما حدث عندما شاهدت فيلم أوقات فراغ الصراحه كنت حاسس ان الفيلم ده معمول عالناصيه عندنا-خصوصا لما لقيت مشهد متصور عندنا في شيراتون- بس فعلا الفيلم ده من الافلام اللي يتقال عليها افلام واقعيه نفس الفراغ بتاعنا نفس مشاكلنا. طبعا اول ما لقيت ان واحد من الابطال في كليه الهندسه و طالع عينه اتاكدت ان كاتب الفيلم كان مستقصدني لأ والالذ وهما جايبينه في المدرج والدكتور بيشرح بيقولهم
وعشان نجيب الاسقاط نعمل موازي عمود موازي - طريقه في الهندسه الوصفيه-وفجاه لقيته بيتكلم في الر سم الهندسي قلت عادي فلتت منه مش مشكله المهم طبعا الواد قرفان من الكليه و طبعا من غير زعل شكر في بنات هندسه علي الأخر .

الفيلم اجمل ما فيه اعتماده علي الشباب اللي بجد كنت حاسس اني اعرفهم قبل كده و اللذيذ انهم مبيعملوش اكتر من اللي اي واحد فينا عمله او بيعمله طبعا كنت عايز اقوم اخنق ابو احمد -اللي بيعد سنه تانيه تجاره- وهو بيزعقله عشان جاي متاخر وبيقوله ان عيب يدخل البيت بعد الساعه 12 -طبعا افتكرت واحد صاحبي وهو واقف نفس الوقفه- انا حسيت انهم بيعرضوا يوم لايف من حايه الشباب و الميزه ان التصوير في الاماكن اللي كلنا بننزل فيها فلفلهبتاع الفول و شارع جامعه الدول وقهاوي مدينه نصر ومصورين في وسط الناس طبيعي جدا

احلي مشهد المشهد النهائي و الساقيه بتاعت الملاهي عطلت بيهم وهما عمالين يتكلموا علي حال البلد وبيقولوا البلد فيها ناس لسه بيكمل الكهربا قطعت فبيقولوله ادهيم سمعوك اهم معلش ما يقصدش طب نزلونا ومش هانفتح بقنا...زقه يا ريس

وحياه ابوك تدينا زقه يا ريس
طبعا انا مش هاقول حاجه علي الاغنيه لان مفيش حاجه تتقال اكترمن انها روعه طبعا كلمات الأبنودي ملهاش حل والصراحه انا مكنتش سمعت لمروان خوري قبل كده بس الصراحه هوفنان محترم

24 Comments:

Blogger taty said...

نور أنا بشوف اعلانات الفيلم على روتانا سينما و حاسة انه حلو فعلاً بيفكرني بأسرار البنات و أكتر حاجة عاجباني فيه _على الرغم من اني مشوفتوش- إن أغلب ابطاله شباب ممثلوش قبل كدة و دة بيخلي المتفرج يحس انها قصة حقيقية فعلاً
وانت بتحكي عن موقف الولد لما كان باباه بيزعقلوا افتكرت فيلم احنا التلامذة لما ابو عمر الشريف كان مش سايبوا في حاله كدة برضه
عموماً انا حاسة من كلامك ان الفيلم فعلاً حلو جداً بس أنا مش هدخله. هستنا لحد ما يجيلي على الكمبيوتر أنا مستنية عمارة يعقوبيان و حليم هدخلهم انشاء الله

6/20/2006 03:54:00 PM  
Blogger NoOR said...

عماره يعقوبيان نزل ميد نايت امبارح

6/20/2006 04:39:00 PM  
Blogger m_elsewedy said...

نووووووووووووور
خياااااانة بتدخل الفيلم من غيرى؟
:D
ده انت هاتموت
:D
على العموووووووم يوم الخميس ان شاء الله لازم ندخل عمارة يعقوبيان ونغير الروتين بتاع كل خميس ده

6/21/2006 12:17:00 AM  
Blogger Lasto-adri *Blue* said...

شيراتون وهندسة
عااااااا

هى الناس دى ورايا ورايا ليه؟؟؟؟؟

مش عايزة اشوف اى مهندس قدامى.. ولا أسمع اى حاجة عن الوصفية ولا الرياضة والفزيا وباقى المواد اللظيظة دى صراحة

كويس انك قلت لى عشان ما ارحش الفيلم نهائى


ياعالم اجازة بقى من هندسة دى



*** واحدة مهندسة طالع عينها فى مشروع.. والشدة على الله

6/21/2006 12:32:00 AM  
Blogger adhm said...

ممكن اغلس عليكم شوية
انا سمعت ان الفرق بين جهنم وهندسة
ان جهنم ما بتحتاجش مجموع كبير فى الثانوية العامة
بتشوف الذل فى جهنم عقابا على سيئات انت اكيد عملتها
انما فى هندسة بتشوف الذل وخلاص
وكمان مافيش حد بيقول ان خريجى جهنم مستقبلهم حلو
وكمان حاجة مهمة جدا
مس ملاحظ ان فية نسبة بنات حلوة فى جهنم عن هندشسة

كفاية كدة احنا فى تجارة ارحم بكتير

6/21/2006 11:32:00 AM  
Blogger taty said...

أدهم تجارة ايه اللي انت فيها؟؟

6/21/2006 01:45:00 PM  
Blogger bosbos said...

الاغنيه وهميه يا نور انا هموت عليها من ساعة ما طلع عبدالرحمن الابنودي في خليك في البيت مع زاهي وهبي و قال كلامها و ذاعو حته منها
كمان كل الحان مروان خوري جميله ازاي متعرفوش ده بتاع فصرالشوق و كل القصايد و خدني معك واطلع فيا هيك وكل الاغاني اللبنانيه اللي الحانها حلوه تقريبا

انما ازاي تدخل السينما من غير سويدي صاحبك هي دي الصداقه؟؟
اوعى تعديهالو يا سويدي

انا جايه اهدي النفوس مش قصدي اي حاجه يا جماعه

6/21/2006 02:03:00 PM  
Blogger NoOR said...

سويدي باشا انت عارف ان الفراغ وحش كنت انا وشريف مش لاقين حاجه نعملها قلنا ندخل سينيما وقلتله نعمل الدنيئه وندخل فيلم جامد و نغيظهم بس مرضيناش ندخل عماره يعقوبيان من غيرك

Lasto-adri *Blue

انا والله اول ما لقيت وصفيه و الكلام ده كنت هاقوم واسيب الفيلم بس اللي كان معايا هداني و قالي اقعد يدوب ثانيتين و لقينا صيدله قالي يلا نقوم ثانيا نتي مشروع يعني ربنا يكرمك وتخلصي مالعزاب ده و ادعيلي اعدي سنه علي طول اصل دي امنيه حياتي

ادهم

الله يكرمك علي رفع المعنويات دي آآآل يعني احنا ناقصين بؤس....شكرا ياعم

بسبس

معلش اصل انا من الناس بتاعت منير وفيروز وكده يعني اجدد اغنيه سمعتها كانت في شريط منير الاخراني
انما وانا بذاكر مع واحد صاحبي السنادي جابلي شريطين لمروان خوري الصراحه -اتكيفت- منهم وعجبني انه مؤلف و ملحن كمان كومبو يعني

ثانيا شغل التسخين و البو تاجاز ده مش عايزينه الله يكرمك العيال مش طايقين بعض خلقه و الخميس الجاي
ها يبقي ام المعارك

6/21/2006 03:35:00 PM  
Blogger m_elsewedy said...

ده انتوا هاتشوفوا يوم لون حمص يوم الخميس ده
طبعا نور الوحيد اللى فاهم
:D
هايبقى ضرب نااار
خلاص انا سامحته يا بسبس عشان هو قبلها بكام يوم قالى تعالى ننزل قلتله اجرى العب بعيد انا برجع انام ومش بقدر انزل غير الخميس
فا انا سامحته
:D

6/21/2006 04:34:00 PM  
Blogger حــلم said...

لما شفت الاعلان فى روتانا حسيت انه فيلم ممكن يكون كويس

بس برضه انا محددة هدفى
حليم ويعقوبيان وعن العشق والهوى

وبس

احنا ناس مهندسين شغالين وبنصحى بدرى
بلا سينما بلا كلام فارغ

:)

6/21/2006 04:45:00 PM  
Blogger bosbos said...

والله انت طيب يا سويدي رغم انه باعك عند اول فيلم و راح من غيرك
وكمان ما قالكش كل سنه وانت طيب في عيد ميلادك

بس تعالى هنا يا نور اما انت بتحب الاغاني القديمه و فيروز و منير ازاي مزرتش اعزالناس قبل كده؟؟مااااشي

هو في ايه يوم الخميس؟؟

6/21/2006 05:21:00 PM  
Blogger NoOR said...

بسبس
مين اللي قالك اني مازرتش اعز الناس انا بشوف عليها ايه كل يوم

ثانيا امال انا عرفتكوا منين؟؟؟؟؟؟
يابنتي بطلي شغل التسخين ده....سويدي صاحبي ومش هايزعل مني ....:)


احلام
الأول اقولك منوره البلوج... انا بجد بقول ان الفيلم ده احسن من يعقوبيان انا قريت الروايه من زمان وشايف ان ده واقعي اكتر وبيتكلم بصراحه ثانيا يعقوبيان مينفعش يدخله بنات

6/21/2006 07:17:00 PM  
Blogger NoOR said...

سويدي باشا :

سماح بقي و مردودالك في اول حركه قله بس عموما من جهه ان يوم الخميس هيبقي اسود من حمص فده اكيييييييييييييييييد

6/21/2006 07:19:00 PM  
Blogger adhm said...

بدأت تجارة بيروت وانتهيت تجارة طنطا
بس دة من زماااااااااااان
عجوز شوية انا

6/21/2006 09:18:00 PM  
Anonymous Anonymous said...

واااااااااااااااااو ..
الفيلم ده شكله تحفة بجد انا لازم ان شاء الله ادخله باذن الله

وبيعبر عن الجيل بتاعنا دلوقتي فعلا

مراسلتكم : قطقوطة

من موقع الحدث ( امام الكمبيوتر ) :)

6/30/2006 02:50:00 AM  
Anonymous قطقوطة said...

واااااااااااااااااو ..
الفيلم ده شكله تحفة بجد انا لازم ان شاء الله ادخله باذن الله

وبيعبر عن الجيل بتاعنا دلوقتي فعلا

مراسلتكم : قطقوطة

من موقع الحدث ( امام الكمبيوتر ) :)

6/30/2006 02:51:00 AM  
Anonymous عماد said...

السلام عليكم

انا دخلت الفيلم ده يا جماعه وطلغ جامد جدا

_استغراق في الواقعيه
_سيناريووحوار شبابي جدا
_اغنيه "دواير" لمروان خوري و كلمات الابنودي اجمل اغنيه فيلم للموسم ده

_الابطال الشباب الي متوقعلهم مستقبل مشرق
_اللي مدخلش الفيلم ده هيفوته كتير

7/02/2006 12:29:00 AM  
Blogger change destiny said...

:) محاضرة وصفية دة انا كنت انتحر


مروان خوري دة اسطورة أنا بعشقه

7/03/2006 03:59:00 AM  
Blogger NoOR said...

قطوطه اهلا بيكي و ان شاء الله الفيلم يعجبك

بس انا عايز افهم عامله اللينك بتاعك علي نجوم اف ام ليه؟

عماد منورنا والله

change destiny

مبروك انك خلصتي الامتحنات بس اوعدك ان الفيلم هايعجبك..........بس متركزيش علي الواد الل في هندسه عشان ما تحبطيش

7/03/2006 12:48:00 PM  
Blogger حــلم said...

نووور

بقولك ايه

نفسى بجد اشوف فيلم بنات وسط البلد

فاتنى الصيف اللى فات

ونفسى اجيبه مش عارفه

تعرف طريقة اجيبه بيها من هنا

7/04/2006 04:48:00 PM  
Blogger NoOR said...

هادور عليه واجيبه ان شاء الله

7/05/2006 02:08:00 PM  
Anonymous عماد said...

يا جماعه انا عايز اعمل اشتراك في الموقع بتاعكم ده بس مش عارف اخش علي الصفحه الرئيسيه ممكن حد يراسلني علي الميل بتاعي و يبعتلي لينك التسجيل

7/14/2006 03:24:00 AM  
Anonymous عماد said...

الايميل بتاعيchabmami9@yahoo.com

7/14/2006 03:27:00 AM  
Blogger anameen said...

علي فكرة يا نور فيلم اوقات فراغ نجاحة من وجهة نظرى واقعية قصة الفيلم لدرجة انك ممكن تحس انك فعلا بتعمل معظم اللي بيعملوا الشباب والبنات اللي في الفيلم والفيلم بيعالج القضايا بدون خجل او كسوف وعلي فكرة فيلم واحد من الناس بردة جميل ياريت لو تدخلة يا نور هيعجبك

8/05/2006 11:03:00 PM  

Post a Comment

Links to this post:

Create a Link

<< Home