Monday, February 18, 2008

ما علينا

مش عارف ليه حاسس ان انا داخل لجنة امتحان شفوي و مع اغتت دكتور في الكليه حاسس اني أول مره أكتب عالبلوج وان الناس هتقول ايه الهبل ده ....ده أساسا لو حد عبرني و قراه

جايز علشان بقالي كتيييييييييييييييييييييييييير بدخل عالبلوج واقرا اللي الناس كاتباه وأخاف ارد ..ساعات بحس بقبقي حاسس اني غريب علي عالم المدونات مشيها مدونات ..... شفتوا ان أنا خلبوص عارف ان اسمها مدونه وهاريكوا بلوج بلوج علشان ابينلكوا اني مثقف وعارف اسمها عربي وانجليزي مع اني كنت ناوي اسميها فتكات علي اسم بنت البواب


ماعلينا ..............أنا كنت ناوي اكتب عن حاجات كتير واقول كلام كبير بس علي رأي عم صلاح جاهين


ساعات افوق ويحل عني غبايا

و احس اني فهمت كل الخبايا

واقوم علشان اكتبب الدرر

الاقيني بكتب حبة غزل في الصبايا


صحيح مصر خدت الكاس و اللعيبه خدوا مكافأت بالألوفات -اللهم لاحسد- بس أنا لسه معايش فلوس اصلح عربيتي و علي رأي سوسه
إزازة الزيت بقت ب 9 جنيه
!!!!!!!!!!!!!!!!!!!!!!!!
اللهم لا اعتراض
و صحيح الفلسطنين دخلوا سينا و ياعالم اسرائيل ناويلنا علي خازوق عامل ازاي .....نرجع ونقول ما علينا
و صحيح ان حجر التفاح غلي علشان المعسل كله راح رفح .....أه والله حتي اسألوا هواري
وصحيح ان انا شيست العربيه .......أه والله حتي اسألو كرم العفشجي
و صحيح ان فاضلي ترم وأخلص من المدعوقه هندسة حلوان .ادعولي بس لحسن دي مش أكيد
بعد كل هذه الحقائق المشكوك في صحتها - حقائق و مشكوك في صحتها - ايوه زي رقاصه و بترقص دي نظريه علميه معروفه المهم .....ماااااااعلينا اكتشفت خير اللهم اجعله خير اني كنت في بيات شتوي أو للدقه كنت في قهاو شتوي حيث أن بيات جايه من بيت يبقي اكيد قهاو جايه من قهوه اكتشفت ان انا ما عملتش اي حاجه مفيده في حياتي من ساعه ما خلصت امتحانات الترم الأول و تقريبا الدكتور المشرف عالمشروع بتاعي هيعمل اعلان خرج ولم يعد ....جروب مشروع تايه ياولاد الحلال
برضو نرجع و نقول مااااااااااااااااا علينا
انا كنت ناوي اقول كلام كبير كبير لكن كالعاده هاقول ان البلوج وحشني وان الناس اللي بتعدي و ترمي سلام هما كمان وحشوني نحب نرحب بالأصدقاء الجدد و كل اللي جه وهنانا ونخص بالذكر
أحب اقولكوا بجد وحشتونييييييييييييييييييييييييييييييييييييييييييييييييييييييييييييييييييييييييي
الدكشنري و لامؤاخذه
خازوق : كلمه عربيه فصحي و في فصل كامل في ميانيكا عن الخوازييق ربنا ما يوريكوا
هواري : كيد القهوجي اللي شغال في المقر الدائم بتاعي المسم بالقهوه
شيست العربيه : يعني لوحت الشاسيه بتاع العربيه بلغه اخوانا الميكانيكيه
كرم : العفشجي اللي كان هايبوس ايدي علشان اصلح العربيه قبل ما تنتحر
هندسة حلوان : أرض العذاب و الضنا
أما بخصوص ما علينا فهي لازمه عندي علطول بقولها وكانت ترد عليا وتقولي انت تعرفه افولها هو مين تقولي دكتور ما علينا من فيلم سيداتي أنساتي
بي اس مهم :احب اهديلكوا الموضوع ده بمناسبه الفالانتاين داي تقروه وده منعا لتكرار المواضيع
أما بقي بمناسبة ان بلوجتي الحبيبة تمت عامها التاني أحب أقول لكل مستمعينا ...أقصد قارئينا كل سنه و انتوا طيبين...................... واسيبكوا مع أغنيه ودع هواك

7 Comments:

Blogger ادم المصري said...

زيميل الكفاح
حلواني قديم
.
.
انما كمان فاضلي ترم يا زميل ونخرج بقي من المدعوقة دي
.
.
عايزك تتحلي بالصبر والشجاعه
.
.
فطريق الاف ميل يبدا بخطوة

2/24/2008 08:09:00 PM  
Blogger ميّويه said...

مش عارفة ليه كل ما دخل بلوج الاقي صاحبه من هندسة
ماااااااعلينا
بشري خير
مع إني بعيدة عنها خااااااااااااالص
اصل محسوبتك ثانوية زفت عامية ادبي
ولله الحمد
وانا ساعات برضه بحس لما اكتب بوست ان مفيش حد بيعبرني عشان بوستاتي (حلوة بوستاتي دي ) بحس إنها مش زي اللي البوستات اللي بشوفها وعليها اقبال كبير
بس علي رأي عمنا محمود عباعزيز
مااعليناااا
وبعدين ايه حكاية "ادعولي احسن دة مش أكيد " دي
ليه كدة
بالتوفيق إن شاء الله
وادعولي اطلع من المدعوقة اللي انا فيها دي أنا كمان
عارفينها طبعاً

2/24/2008 09:18:00 PM  
Blogger NoOR said...

عم أدم : بم اننا في الهم حلوان احب احيك علي روح التناؤل دي بس انا طريق الألف ميل بتاعي دخل في الألف و ميتين شكلي لازم اغير زيت :)


ميويه : ازيك يا جميل الحمد لله انك ادبي بس نصيحه لوجه الله خدي بالك وانتي بتكتبي الرغبات لحسن يدخلوكي هندسه غصب و اقتدار

ربنا يوفقك في الثانويه الهامه بتاعتك و تجيبي ميه وعشرين في الميه بس ما تدخليش هندسه :)

2/25/2008 02:32:00 AM  
Blogger light-elrahman.com/ said...

شركة تسليك مجارى بسيهات وعنك
شركة عزل اسطح براس تنورة
شركة عزل اسطح بسيهات وبعنك
شركة مكافحة حشرات براس تنورة

4/25/2017 09:22:00 PM  
Blogger حاتم النجار said...


شركة فارس الفرسان للخدمات المنزلية
ارقام شركات تنظيف بالجبيل

9/11/2017 02:22:00 AM  
Blogger حاتم النجار said...


شركة شفط بيارات بالدمام
شركة شفط بيارات بالخبر
شركة شفط بيارات بالجبيل
شركة شفط بيارات بالاحساء
شركة شفط بيارات بالقطيف

9/11/2017 02:40:00 AM  
Blogger حاتم النجار said...

كشف تسربات المياه بالدمام

9/11/2017 02:54:00 AM  

Post a Comment

Links to this post:

Create a Link

<< Home