أنا وسويدي عند سعاد

مش هاقولكوا واحشني و المدونه ضلمه من ..................من غيري طبعا احنا هنهرج ولا ايه ما هو ما ينفعش تبقي ضلمه من غيركوا لأن مش هيبقي فيه مدونه أصلا.

ايه رأيكوا في البوقين دول

هيييييييييييه بتقول ايه .............الله عليا .....بحبني وانا مبسوط علي غير العاده

ما علينا اخيرخلصت امتحانات و بقيت شاب صايع قد الدنيا مالبيت للكاباريه لامؤاخذه قصدي القهوه و مالقهوه للبيت طبعا الكلام ده من اسبوع بس اعمل ايه في حاله التناحه المزمنه اللي عندي .....عايز اقولكوا اني من ساعه ما خلصت كل اللي بعمله اني قاعد عالكنبه بتفرج علي الام بي سي تو وباليل عالقهوه يااة وحشتني حياة الصياعه دي , بس للأسف عملت جدع و دبست نفسي مع واحد صاحبي و اتفقت معاه ننزل نلعب في الجيم مع بعض ومن ساعتها عينك ما تشوف الا النور عضمي ادغدغ و مفاصلي سابت و حاله نيله خالص - الله يرحمك ياعم محمد عوض كان رائد مدرسه ادي ضهرك للترعه- مش قادر اقولكوا ان بتاع السوبر ماركت كان جايب شويه حاجات للبيت فأمي قالت لي تعالي شيل الشنط دي دخلها جوه طبعا مش هاقولكوا عالمعاناه اللي كنت فيها مالباب لغاية المطبخ حسيت اني شايل طن حديد مش كام كيس مكرونه وكام صابونه وعلبه مناديل.ومن يوميها وانا ميت في البيت مابعملش حاجه غير اني ماسك ريموت الدش.

واخيرا ربنا تاب عليا و فك القفشه اللي كنت فيها - كنت بمشي زي عم أمين الآلي - و من ساعتها وأنا ماشي علي مبداء حرمت يا بوجي حرمت

نسيت اقولكوا مش انا والواد سويدي رحنا مع بعض حفلة سعاد ماسي - كان فكرة سويدي الله يسامحه بقي - كنت مكسر وصاحي من الساعه تمانيه علشان افتح للصنايعيه اللي بيوضبوا المكتب والاقي الباشا بيكلمني و يقولي تعالي ده في حفله لسعاد ماسي طبعا العبد لله ولا كان سمع عنها غير في اعلانات مصراوي بس مرضيتش ابين جهلي قلتله يااه ده انا كان نفسي احضرلها حفله قالي طب قشطه دي الساعه سبعه المغرب انا مستنيك . طبعا انا رايح ميت لأ ورايح باللي عالحبل مش بقولكوا كنت واقف مع الصنايعيه في المكتب يعني لازم الواحد يكون لابس ومتشيك امال هاقابل الصنايعيه لاسمح الله ببنطلون عمره الافتراضي انتهي من خمستاشر سنه وشبب بصباع ابدا ده حتي عيب, بس بجد كانت حفله لذيذه صحيح الواحد مافهمش ولا كلمه من اللي غنتها الأخت سعاد بس يكفي ان سويدي كان مقتنع .

بس الصراحه كان في فرقه اسمها الدور الأول عزفوا قبل الست سعاد كانوا تحفه جامدين جدا الصراحه لدرجه اني عمال ادور علي اي سيديهات ليهم

واخيرا بقي بما ان اغاني الست سعاد ماسي كانت رائعه - هو الكدب خيبه انا ماكنتش فاهم الكلام بس الموسيقي كانت جامده- قررت استفيد بالفيو الرائع ده واتحفكوا بشويه الصور اللي صورتها من أعلي تلال قله الناصر صلاح الدين محمد الأيوبي واسم الدلع يوسف

دي بقي صور لشباب فرقة الدور الأول اللي فعلا عاجبني جدا