Valantenoooooooo
كل فالنتين والأمه الاسلاميه والعربيه بخير طبعا بما اني شاب رومانسي عالاخر وبما اني في كامل وعيي لدرجه اني اتخضيت لما عرفت ان احنا بقينا في شهر فبراير (شهر الحب) - منه لله اللي كان السبب - فوجئت النهارده و انا عالقهوه بالواد شريف صاحبي جاي وماسك علبه حمرا
سألته ايه دي
هو( باستغراب وكأنه بيكلم واحد مجنون)-هديه الفالنتين انت ايه مش عارف ان النهارده 14
أنا (وعلامات البله علي وشي )- اربعتاشر ايه
هو (بعدأن تأكد اني مجنون) -اربعتاشر فبراير يعني هايكون اربعتاشر اكتوبر
أنا - ياااااه ده علي كده عيد ميلاد اخويا فات من اسبوع
هو (بقرف) - كل سنه وانت طيب
طبعا خلاصه الكلام اكتشفت اني كنت نايم يجي اسبوعين من ساعه ما خلصت امتحانات الترم لأ والأدهي اني اكتشفت اكتشاف رهيب ان الدراسه ابتدت من اسبوع من غير ما حد يقولي مع اني مش موافق عالكلام ده ازاي يبتدوا الدراسه والشعب بيحتفل بالعيد القومي للحب الصراحه ان مضطر اقولها و أمري عالله
اتنيلوا علي خيبتكوا
بقي شعب مش لاقي ياكل ونصه تحت خط الفقر وبيجيب هدايا بالملاين للفالنتين طب اتحدي ان حد من اخوانا الحبيبه يكون عارف مين الحاج فالنتين ده
نسيت أحكيلكوا علي كميه الاحمر اللي كانت في الشارع انا قلت الاهلي خد كاس العالم ولا ابو تريكه كان بيطاهر ابنه
و في الختام احب اهديلكوا اغنيه ايها الراقدون تحت التراب
ابقوا سلمولي عالحاج فالتنينوا كتير وقلولوا الواد نور بيقولك ماتبقاش تعوق علينا لحسن بتوحشنا
بس الصراحه عندي اعتراف صغنن قااااااااااد كده انا لما شفت ان الواد شرشر -شريف يعني - المزه بتاعته جابتله ساعه بحوالي تمنميت تسعميت جنيه قلت مش كان زماني جايلي حتة عربيه صغننه هديه الفالتنين
جاتنا نيله في حظنا الهباب
Labels: عيد الحب
posted by NoOR at 3:27 AM
10 Comments:
أنا عن نفسى مش معترض على عيد الحب بس معترض على انه يبقى على أنه يبقى عيد من الاساس ممكن يبقى مناسبه أما موضوع الهدايا الغاليه دى أنا شايف انها تفاهه شويه ممكن هدايا رمزيه أوى يعنى أو هابى فلنتين أوى على أقصى تقدير يعنى ما يبقاش عيد عيد يعنى
كل سنة و انت طيب يا نور
يابني فوق من الي انت فيه دة
الفالنتين فالنتين لأصحابه
وعد : أولا انت نورتنا
ثانيا : هو بس اي حد يجيبلي هديه وبعد كده يلغوه علي طول
تاااااااتي : انتي فين انا قلت انتوا اتخطفتوا ازيك و ازي بسبس
بس يعني ايه الفالنتين لاصحابه ..احنا مش قد المقام ولا ايه
بي اس : هديه فالنتين لأخوكوا الغالبان بدل ما يجلي حاله نفسيه
هو انت من انصار كتنا نيلة ف حظنا الهباب زيي انا وصحابي يالا يا نور هابي فلانتين داي تو يو :)
نوران:علي فكره انا من المؤسسين أما موضوع هابي فالنتين فمش هاقولك غير الله يسامحك
شررررررررررررررررررررررررررررريف جاله هدية ب تمنميت تسعميت جنيه؟
يا ابن ال ايه فكرنى النهاردة اخليه يبيعها ونخرج خروجة عدلة بالفلوس بدل قعدة القهوة اللى بتجيب كساح دى
:D
بس اومال لو كنت جيت وسط البلد يا نوووووووور ده العملية كانت ملعلطة على الاخر اول مرة اشوف بنات حلوة فى شارعنا كان امبارح
:D
هما غالبا هما هما البنات بتوع كل يوم بس استحموا حومية العيد
:D
rabena yehdeena we yehdy el gamee3 ya Noor ,, we 3ala el 3omoom ,, el Valentine ,, da wa7ed men asbab el tatfeeh we el tastee7 le 3o2ol el nas hena 3andena ,, e7na fai2een le el Valentine we el kalam el 3abeet ,, we saibeen el nas 7awaleena tegry we tet2addem ,, le7ad ma yeegy 3alena yom ,, mesh hanla2y 7aga neshtery beeha 2oot yomna ,, gheer el dababdeeb el seeny ,, we el werood el holandy
salamat
Have a Nice Day man
استنجلينا : انت فعلا قلت خلاصه الكلام
ربنا يسترها معانا
اولا ياسيدي انت نورت البلوج ابقي كرر الزياره يا باشا
والله ما بتفرق معانا
خاااالص
ياللا
كل سنة وانت طيب
وفوق بأة
الترم قرب يخلص
حلم : انتي فييييين ...... وحشاني
وانتي طيبه ,......بس ترم ايه اللي هايخلص ده يادوووووب بادئ من شهر يعني اسبوعين ونلاقي الميد تيرم في وشنا
الله يحرق اللي بدع حكايه الميد تيرم دي
Post a Comment
<< Home