Thursday, May 31, 2007

ذاكر يذاكر




وحشتوني ....وحشتوني ....وحشتوني

أقدر اقول بما لا يدع مجالا من الشك ان حياتي تتمحورحول هذه الثلاث كلمات (ذاكر-يذاكر-مذاكره)
كلام كبير وكلام معقول مش فاهم انا حاجه منه -الله ينور ياجدعان بيني بهزي يارداله- متقلقوش دي اعراض الايام الاولي للحمل يووووه أقصدي الايام الأولي للأمتحانات


حاسس باني عندي حاله جنان مصاحبه بحالة انفصام في الشخصيه اصلي امتحنت مادتين باربع داكاتره الاربعه بيتكلموا عن الجيير بوكك اللي هو صنوق التروس ولا مؤاخذه - الدربكس بلغه اخوانا الصنايعيه- المهم كل دكتور قافله معاه يشتغل برموز و يونتس غير اخوه تلاقي واحد ابن حلال شغال الباور بالكيلو وات والتاني خدها علي كرامته و حلف طلاق تلاته ليشتغله هورس باور - قوه حصان يعني أخت قوة جبل ( ماونتن ديو لا توقف ) - ما قولتلكوش عالدكتور العسل اللي جاب امتحان لذيذ اخر حاجه كان ممكن يختصره في كلمتين ( اكتب المنهج ) ..يا جماعه الرحمه مطلوبه مش كفايه اننا بنمتحن في اجواء غير انسانيه - جوانتانامو حضاري عنها - خد عندك امتحان من الساعه واحده للساعه اربعه - الضهر طبعا مش عاوز ذكاء الله يكرمكوا كفايه الشاب الممتع اللي جنبي في اللجنه- و اللجنه في الدور 600 الساتت يعني -علي رأي عم شحاته- نسيت اقولكوا ان الحمام الوحيد اللي مفتوح للعامه والدهماء - اللي هما الطلبه- في الدور اللي تحت الارضي -ما هو عقبال املتكوا احنا عندنا الورش تحت الأرض-يعني لو واحد اتزنق في نص الامتحان وحب ينزل الحمام علي ما يروح ويرجع يكون الامتحان خلص - سامع واحد رايق بيقولي اسانسير ماشي هفوتها المره دي بس عشان احنا في ايام مفترجه والواحد مش عاوز يغلط- نيجي بقي علي الاجواء المصاحبه للامتحان عندك الفيو المطله عليه اللجنه هو منظر شديد الشاعريه انت الصراحه يعني عندك اكتر من اوبشن وانت وحظك ممكن تكون لجنتك مطله علي المحاجر اللي ورا الكليه أو تكون امك دعيالك وخدت فيو المشرحه القديمه ويا سعدك ياهناك بقي وانت بتمتحن بين الأطلال وفي كلا الحالتين نصيحه اخويه اوعي تطلب من المراقب يفتح الشباك .... اخ مش قلتلك ماتفتحش الشباك اهو لوح القزاز الاتنين متر في متر ونص كان هايتفش علي دماغ الشاب المسكين اللي قاعد جنب الشباك


الحق اقوم اقرالي كلمتين لامتحان السبت


ابقوا فكروني احكيلكوا عالعمود اللي طلع معايا خمسه مللي واللي كان شايل ترس قطره 160 مللي

ولا الباور سكرو- كوريك يعني -االلي طلع قطره يرفع كوكب الارض

9 Comments:

Blogger taty said...

ياعيني يانور
يابني قطعت قلب و اله
ماتشد حيلك بقا و تنوي انك تخلص الكلية بقا و ترتاح
ربنا معاك و بالنجاح

6/03/2007 03:32:00 PM  
Blogger taty said...

نور
عندي سؤال بعد اذنك
الا هو سويدي اختفى و راح فين؟

6/03/2007 03:38:00 PM  
Blogger NoOR said...

تاتي : وحشااااااااااني والله

سويدي فين ؟ وانتي و بسبس فين ان شاء الله

هو سويدي عقبال عندك كده مسك منصب مهم و بقي مش فاضي خالص انا بقالي شهر ما شوفتوش خالص

اما بمناسبه الكليه فده موقف مش اكتر انما ان شاء الله تكون السنه دي فتح الانطلاقه و ننطلق بقي :)

6/04/2007 01:32:00 PM  
Blogger مدونة كسبان said...

ربنا يكرمك يارب
هتعدى ياعم
انا خلصت اهو
وبقالى 5 تيام قاعد
على النت
خلص
وابقى تعالى
انا موستنيك

6/19/2007 05:17:00 AM  
Blogger Nouran said...

ذاكر يذاكر مذاكرة
حاجة جميلة جدا حسبي الله ونعم الوكيل ربنا معانا يا بني بس جامدة الورقة اللي انت حاططها ديه :)

6/23/2007 03:38:00 PM  
Blogger NoOR said...

كسبان : انا خلصت اهو و خلصت بكسر الصاد ........ربنا معانا جميعا


نور.....ان :- وحشاني والله عملتي ايه في امتحاناتك يارب خير كده

اما عن الورقه ف متغلاش عليكي

6/23/2007 03:47:00 PM  
Blogger Nouran said...

نور هو فين سويدي ؟؟
ابقى اقوله كل سنة وهو طيب :)

6/23/2007 03:56:00 PM  
Blogger NoOR said...

وانت طيب يا جميل ..... هو بس مشغول في شغله حبتين ... وباين عامل فيها مهم

هو كان لسه معايا في حقلة سعاد ماسي و كان ناوي ربنا يكرمه ويكتب بوسط عنها ويحط الصور اللي صورناها هناك

6/24/2007 04:40:00 PM  
Blogger saso said...

heeeeeeeey
كل كام يوم ادخل اشوفك القي نفس البوست
اكتب جديد بقي

8/20/2007 12:43:00 AM  

Post a Comment

Links to this post:

Create a Link

<< Home