Wednesday, September 13, 2006

كلهم ليلي و احنا ايه نظامنا

خير اللهم اجعله خير ............راجع مالمصيف في حالي لا بيا ولا عليا ادخل عالبلوجات اشوف الدنيا فيها ايه الاقي ليلي ما علينا طب البلوج التاني بردو ليلي التالت ليلي -الدنيا اتغيرت من ساعه ما سافرت ده حتي شيبسي عمل شيبسي بالفته و ورق العنب كل ده لما أنا سافرت -المهم قلت اما اشوف موضوع ليلي ده ايه حواره الاقي البنات والستات قرروا يعملوا ثوره علي المجتمع الذكوري ذو النظره القبليه - الله أكبر في عين اللي ما يصلي عالنبي- كلام كبير اكدب لو قلت اني فاهم منه حاجه قلت واحد واحده وتاته تاته نفهم بردو الواحد كان في غربه والغريب اعمي ولو كان بصير المهم لقيت كل انسه وسيده ادلت بدلوها وعلقت المشانق للازواج والاخوه والاباء آل ايه لاستخدامهم نظريه الكيل بمكيالين - غير بتاعت امريكا واسرائيل- وان الولد ولد يعمل اللي علي مزاجه والبنت يا ولداه المقهوره المظلومه
انا راضي زمتكوا مين اللي مقهور الرجاله ولا الستات طبيب ناخد مثال
راجل متجوز وعنده تلت عيال وشغال في ساقيه ليل نهار عشان مجرد يوكلهم تلاقي الوليه مراته الحق يا منيل الواد ابنك انضرب في المدرسه لازم تروح تبهدل الميس اللي ضربته الراجل ينزل الصبح مع الواد المدرسه ويتخانق مع الميس وبعد كده المدير و يتاخر عالشغل ويتخصمله يوم
تاني يوم
راجع مالشغل ونفسه يسلم عالسرير يلاقيها ضاربه بوز وسحابه عكننه
الراجل : مالك عالمسا
المدام : يعني مش عارف ان ماما تعبانه
الراجل : وايه الجديد ما هي من ساعت ما اتجوزنا تعبانه
المدام : ما هو انت قاصد انك تتاخر في الشغل عشان ما تروحش تسلم علي ماما
الراجل: معلش كان المدير قاعد وطلب مني اخلص شويه شغل
المدام : اه ............ما هي لو كانت امك كنت سيبت اللي في ايدك وجيت جري
الراجل: ........................... انتوا فاهمين
تالت يوم
الوليه صوتها جايب اخر الشارع يجي يلاقيها اول ما شافته قعدت تعيط
جوز الست:- مالك
المودام:-الحق الجاره اللي تحت بهدلتني و فرجت عليا الشارع
جوز الست:-طب ليه كده
المودام:- انت لسه هاتسال انزل امسح بيها هي و جوزها سلالم العماره
جوز الست:- يا ستي استهدي بالله انا جاي مالشغل تعبان و مش شايف قدامي
المودام:- (تعيط) اه مانا كرامتي مش مهمه عندك
جوز الست :- طيب افهم ايه السبب
المودام: - كل ده علشان نفضت السجاده وهي حاطه غسيل
جوز الست :- لأ مالهاش حق
كفايه كده
امثله تانيه :- جرب اقف بعربيتك في اي حته وقول انها عطلت هاتتشتم ويقولولك ابعدها عن الطريق ................طيب لو واحده هي اللي حصلها كده تلاقي تسعين واحد يصلحالها
قول انك اتسرقت وانت في رمسيس ولا حد هايعبرك ................خلي بقي واحده تزعق وتقول اتسرقت قبل ماتكملها حاجتها تكون رجعت
ادخل اتوبيس و انت تعبان ومش قادر تقف .......ولا حد ها يعبرك
لو بنت دخلت الكراسي كلها تفضي
دي كانت وجهه نظر كوميديه للموضوع انا مش مع ان الستات تبقي كائنات ثانويه ولا مع ان الرجاله كلهم ابو لهب و دراكيولا و كازانوفا
زي ما في ستات ملايكه في شياطين والرجاله كمان
نداء اخير :................................ يا رجال العالم اتحدوا
فاكرين المسلسل ده كان مسخره وكان الرجاله فيه كلهم متهضدين عادي يعني

24 Comments:

Blogger taty said...

حمد الله على سلامتك يا باشمهندس
انا أول مرة اسمع عن الشيبسي بالفتة دة
إنت بتتكلم بجد و الا بتهزر؟؟؟
و مسلسل يارجال العالم اتحدوا دة كان مسلسل تحفة
كنت بموت في بطرس و آليس
و الواد ابن احسان اسمه كان موني باين لما صوت من شباك العربية و قال ان مامته خطفاه
بعد كدة لما تبقى ناوي تغطس إبقا قول قبلها

9/13/2006 11:05:00 PM  
Blogger حــلم said...

حمدالله على السلامة

بلاش تخبط فى الحلل يا نور وخليك آدم متحضر
دى مش ثورة نسائية ولا حاجة دى كانت نداء من ليلى لكل آدم أن يستمع ويشغل حواسه المعطلة ويحس شوية بيها
احكيلنا بأة عن المصيف
خليها فى بوست لوحده علشان تعرف تحكى
هم صحيح عملوا شيبسى بالفتة بجد
علشان الولاد يعنى باسأل
:)

9/14/2006 01:33:00 AM  
Blogger saso said...

وانا اقول اختفيت كل دة فين
ابقي قول بعد كدة بدل مابعت العيال يدوروا عليك في كل حتة
نرجع لليلي في الاول انا مركزتش انها موجودة عند ناس كتير وماضايقتنيش طبعا ..اية بتحصل!! بس رجعت في كلامي من البوست بتاع آدم لما قال مفيش داعي للتقسيم والتنميط وان كان الموضوع عام وحاصل تمييز اجتماعي مش بس للنوع دة في السن في درجة التعليم ف المستوي الاجتماعي في الديانة او التدين كل طبقة عاوزة تتلاحم مع بعضها وتتجاهل باقي الطبقات
يعني انت ممكن تكون مضطهد او اي حد مش بس ليلي
فولت الاضطهاد اعلي شوية مع البنات فبلاش تاخد الموضوع حملة ومظاهرة بدل ماتبقي انتي فيمنست ومش هتخلص من ليلات

9/14/2006 02:57:00 AM  
Blogger توهة said...

ياااااااادى الخيبه هو انا كل مادخل مدونه ألاقى الموضوع ده
يا خوانا هى المشاكل التانيه خلصت ولا ايه قولولىىىىىى
عشان لو خلصت أزغرط وأبل الشربات وبعدين أجى أكلم فى الموضوع ده

وإنت يا نور يازعلان يا مظلوم مفرقتش كتير عن أنصار ليلى دخلت شمال فيها زى ماهم دخلوا شمال فى مرسى ولا ادم

وبعدين الحجات دى كانت أيام الثمانينات أيام الأفلام الهبله وماجده ورشدى أباظه

إحنا بنرج ورا بدل مانطلع قدام

طب ليلى غلطت خليك إنت يا مرسى الكبير

طب والله إحنا قلبنا طيب و لو قلتم لكل الليلات عندكوا حق حيرضوا ويسكتوا

يووووووووه أنا أسمع محمد منير أحسن



فانتازياااااااااااااااااااااااا
فانتازياااااااااااااااااااااااا

9/14/2006 03:27:00 AM  
Blogger bosbos said...

اولا حمدالله على السلامه يا باشمهندس
ثانيا انا هسكتلك بس عشان انت غالي على كل اليلات
ثالثا بقى محدش قال ان كل الرجاله شياطين و لا كل الستات ليلات مقهورين كل واحده قالت وجهة نظرها من خلال تجربتها الشخصيه واللي بتشوفو حواليها في المجتمع
رابعا الامثله اللي انت اديتها دي مش عارفه جيبتها منين بصراحه تصدق و تامن يالله؟ انا شنطتي اتسرقت في قلب الشارع اللي انا ساكنه فيه و بقو شايفين الحرامي بعيونهم ولا حد عبرني و اتحرك
مره تانيه كنت في اتوبيس مع تاتي ايام الكليه و تعبت و كنت هقع ولا حد اتحرك و قعدني لدرجه اننا نزلنا من الاوتوبيس في نص المسافه

9/14/2006 10:23:00 AM  
Blogger NoOR said...

تاتي : مش هاقولك واحشاني قد ايه انا كنت حاسس اني في غربه من غير النت لدرجه اني كنت هاولع في نفسي علشان مخدش اللابتوب معايا قولت كده كده مش هبقي فاضي البحر بقي و المزز وكده يعني

علي فكره أؤكد و علي ضمانتي الشخصيه بوجود شيبسي بالفته و شيبسي بورق العنب بالذبادي كمان

يارجال العالم اتحدوا من اكتر المسلسلات اللي كنت بحب اشوفها اني عارفه مليش في التليفزيون وامي علي طول مسلسلات بس الحمد لله بطلتها تتفرج عليها


أنا كنت ناوي اعمل يافطه في ميدان التحرير اقول اني في الساحل بس خوفت الاقي بنات مصر كلها راحت علي هناك
علي اساس الشبه الكبير اللي بيني وبين حسين باشا فهمي

9/14/2006 03:25:00 PM  
Blogger NoOR said...

حلم : الله يسلمك وحشاني والله

انا مش بخبط في الحلل ولا حاجه ده حتي انا متحضر عالاخر مع الجنس الاخر حتي اسالي سويدي وهو يقولك - صح يا سويدي عارف لو قلت الحقيقه ها اقفلك البلوج بتاعك- انا بس مبحبش التحكم انتي عارفه انا كنت مرتبط بواحده وكانت زي القمر بس مشكلتها انها عايزاني ليها لوحدها طبعا كرهتني في حياتي و كنت ناوي اول في نفسي وفيها وفي اللي عرفني عليها

بس المعامله بين اتنين لما بيبقي فيها حب - لسه ما شوفتهاش دي - اكيد بتبقي رائعه كفايه لمسه ايد او حضن من انسان بتحبه

اكيد يا حلم بلاوي المصيف دي بوسط لوحده

كلمه وقلتها
الشيبسي بالفته موجود يا عالم :)c

9/14/2006 03:30:00 PM  
Blogger NoOR said...

ساسو ازيك عامله ايه انا بس السفر جه علي حين غره- بالنحوي - كنا قاعدين عالقهوه ولقيت العيال جابين شنطهم معاهم في العربيات قمت مروح مجهز شنطتي وسافرت بس رحت بالقطر تاتي يوم الصبح عشان كانت الساعه اربعه الصبح و لحتش اجهز بسرعه

انتي عارفه انا ايام المدرسه كنت عدو الوأه رقم واحد رغم ان كان معظم اصحابي بنات وجايز ده اللي خلاني اكرهم - من غير زعل يعني - بس انا شايف دلوقتي ان موضه تحرير المرأه والكلام الفاضي ده حمض يعني اتفرجي علي برامج التليفزيون تلاقيهم بيتكلموا نفس الكلام بتاع الحاج قاسم امين طيب ماهو البنات بتتعلم وبتطلع من الاوائل و بيشتغلوا والرجاله مش لاقيه شغل عادي يعني فين الاضطهاد

لكن لما اخوها وابوها يخافوا عليها ده مش اضطهاد

لو قرينا الدين صح ها نعرف حقوق وو اجبات الراجل والست
يعني عندك النبي عليه الصلاه والسلام قال لو لمخلوق ان يسجد لمخلوق لأمرت المرأه ان تسجد لزوجها

طبعا ده للاحترام و الموده لكن لو الراجل بيعامل الست وحش ياخد علي قفاه

معلش طولت لكن فعلا احنا بنتعامل ان كل طبقه منغلقه تماما علي نفسها و بتخاف وتكره الناس التانيه زي موضوع الاسلام والمسيحيه لكن دي مشكله تربيه وعادات خاطئه

سلام لحسن شكلك زهقتي

9/14/2006 03:40:00 PM  
Blogger NoOR said...

والله يا عم كروان انت شرفتنا ومعاك حق بس انا كمان زهقت كل شويه ليلي ليلي لما اتخنقت


بس ما قولتليش بتسمع ايه لمنير اصل انا مدمن منير

حلو قوي حوار التمانينات انت باشا والله

معاك حق يا باشا

9/14/2006 03:42:00 PM  
Blogger NoOR said...

بسبس : اولا الله يسلمك يا عسل
ثانيا :انا غالي علي اليلات الله يكرمك يا جميل

واحشاني والله

ثالثا : انا قلت كده

رابعا: انتي بس تلاقيكي زي حلاتي من سكان المناطق الفافي علشان كده ماتلاقيش ولاد بلد جدعان يساعدوكي كله توتو و لولوو مامي جايبالهم البيبي سيتر عشان بيخافو يمشوا في الشارع لوحدهم

اما موضوع الاتوبيس فقوليلي بس رقمه كام وانا اربيهملك الكلاب دول حد يسيب العسل ده واقف وهو تعبان ناس معندهاش دم

9/14/2006 03:48:00 PM  
Blogger مفلس افندى الرايق said...

كلهم ليلى واحنا ايه نظامنا

احنا نبعد عنهم نعيش ف حالنا

مهما عشنا نحبهم

حارقين ف دمنا

اجيلها تعمل زبادى

تقولى ماعنديش سمنه

اقولها عاوز شاى

تقولى كام معلقه لحمه

كلها حاجه يعملوها ازمه

حاجه صعبه

هههههههههههههههههههه

يا جماعه اوعى حد يقول عنى واد مفترى احنا بنهزر

9/14/2006 04:51:00 PM  
Blogger bosbos said...

بس المعامله بين اتنين لما بيبقي فيها حب - لسه ما شوفتهاش دي - اكيد بتبقي رائعه كفايه لمسه ايد او حضن من انسان بتحبه

تصدق نرفزتني
مهو يا اما انت فاهم الموضوع غلط خالص يا اما هما دول الكلمتين اللي كل الرجاله بيضحكو علينا بيهم لحد ما نصدق انهم فهمونا و بعدين الوش التاني يبدا يظهر
مش هو ده الحب والله ده في الاول بس بعد كده الوضع بيختلف تماما
متقلبش عليا المواجع و النبي و بلاش النظره الرومانسيه دي عشان بعد كده
متتعقدش

و بعدين اديك اهو مطقتش ان واحده عايزاك لنفسها لوحدها امال عايزها تعوزك شرك مع البشريه سبحان الله ولو سابتك بمزاجك هتقول مبتهتمش بيا و حلقالي يعني عايزين ايه مننا تهبلونا كده و خلاص
حسبي الله و نعم الوكيل

9/14/2006 06:01:00 PM  
Blogger NoOR said...

مفلس افندي : ويلكم ان ماي بلوج

ايه ياعم حكايتك كله شعر مفيش ضرب

9/14/2006 07:08:00 PM  
Blogger NoOR said...

بسبس مين ده اللي يقدر ينرفزك يا باشا ده انت الخير والبركه بس انا بتكلم بجد في موضوع الرومانسيه بس المشكله ان الواحد خلقه ضيق ومبيستحملش حاجه لمده تلات دقايق فما بالك بالعمر كله ولذلك - حلوه لذلك دي- انا ناوي افضل عازب ......العمر مش بعزقه

ثانيا : ما أنا قلت لسه ما شفتهاش
يعني تلاقي واحده بتحب واحد وهو حالقلها يا اما واحد بيحب واحده وهي منفضاله

نصيحه يا بسبس الرجاله بيحبوا اللي يتقلوا عليهم و يعذبوهم اه والله
وعلي راي السيد هشام عباس : سيبها تحبك حبها تسييييييييييبك

و الي اللقاء مع حلقه اخري من برنامج حياتي

9/14/2006 07:16:00 PM  
Blogger Nouran said...

حمدلله ع السلامة يا هندزة رجعت لقيت الشيبسي ده مشفتش اللي بالشاورمة طعمه وحش اوي يع
المهم انا كمان كنت متغاظة من موضوع ليلى ده معرفش انتشر بسرعة رهيبة بس انا الحمد لله غيظي اتفك لما كتبت ع الموضوع ده من وجهة نظري
بجد كنت بكره المسلسل بتاع يا رجال العالم اتحدوا كان سخيف جداا وليلى فيه كانت مفترية اوي
وحمدلله ع السلامة مرة تانية يا هندزة

9/14/2006 07:55:00 PM  
Blogger NoOR said...

الله يسلمك يا جميل .......انا بردو قلت اكتب افش غلي شويه

هو في بالشاورمه كمان .... كل ده عشان سافرت

بس ليه ما بتحبيش المسلسل ده حتي كان مسخره

استعدي يوم السبت هايبقي اول يوم ليكي في كليه الهندسه وها نقلك يا باشمهندسه

بس بجد لازم تعملي بوسط لليوم ده ... أنا مستنيه

9/14/2006 08:07:00 PM  
Blogger taty said...

نور يا نوووووووووووووووور
أسكت كلامك طلع صح
في سيبسي بالشاورمة و بالفتة و بورق العنب بالزبادي
و الكيس بجنيه مش بخمسين قرش زي باقي الأكياس
و انا جربتهم التلاتة مع اني بطلت أكل شيبسي و الحاجات دي خالص
بس قلت أدوق يعني
اللي بالشاورمة دة وحش قوي مش حلو ملوش أي صلة بالشاورمة
و كمان بتاع ورق العنب طعمه مش ورق عنب خالص
اللي حلو اللي بالفتة طعمه بالخل و الثوم كدة حلو قوي جربه
بمناسبة ورق العنب الشيف أسامة السيد الهي ربنا يعمر بيته كدة و يفتحها علينا زي مافتحها عليه و نعرف نطبخ ربع اللي بيطبخه
عمل مرة فرخة محشية ورق عنب و الله
و ورق العنب كان محشي و ملفوف و كل حاجة
تخيل

9/15/2006 02:55:00 AM  
Blogger NoOR said...

علشان تعرفي ان نور كلامه لا ممكن ينزل الأرض ابدا.....بس انا هاجربه علي ضمانتك لو طلع وحش هاخد منك الجنيه........ده جنيييييه يا عالم

انتي مالكيش في الطبيخ !!!!!!!
وقاعدين تدافعوا عن حريه
المرأه .. ربنا يستر علينا

بس الفراخ المحشيه ورق العنب دي زي البط اللي محشي حمام بالفريك؟؟؟؟؟

9/15/2006 04:26:00 PM  
Blogger ayhm jzzan said...

حبيبت ما كتب مفلس أفندي الرايق بس نقدر نبعد ؟؟
شكلو صعب
مدونة جميلة سعيد بالتعرف عليك واتمنى تزورني في مدونتي

9/16/2006 12:21:00 AM  
Blogger Nouran said...

ع فكرة انا رايحة يوم الاحد هههههه

9/16/2006 03:16:00 AM  
Blogger m_elsewedy said...

ياض يا نووووووووور
احنا نعمل كلما مرزوووووق
:D
وبعدين يا تاتى انتى بتتفرجى على برنامج العك اللى بيجى على قناة النيل للاسرة والطفل ده؟
:D
امبارح كان بيعمل ورق عنب بالمكرونة الاسباجتى وجمبرى بالكمثرى واللحمة المفرومة وملوخية بالجمبرى وكشك بالجمبرى

وحاجة اخررررر عك
:D

9/16/2006 08:38:00 AM  
Blogger saso said...

اللة يجازيك يا نور
بسببك رحت جبت البتاع دة اللي بالشاورمة اصلي ملقيتش شيبسي ورق العنب قاللي في شاورمة وفتة
المهم النيلة دة قلبلي معدتي بقالي يومين
مش تكتب السايد ايفيكت يا نور؟

9/16/2006 08:32:00 PM  
Blogger NoOR said...

ayhm jzzan
انا اسعد يا باشا

نوران : ابقي احكيلي عملتي ايه

9/17/2006 02:39:00 PM  
Blogger NoOR said...

سويدي : يالا كلنا مرزوق

ساسو : ماهو انا عرف الموضوع ده متأخر
عموما هاقول للصايدلي مايطلعوش غير بروشته :)c

9/17/2006 02:42:00 PM  

Post a Comment

Links to this post:

Create a Link

<< Home