Friday, September 15, 2006

لما الشتا يدق البيبان

دخل الشتا قفل البيبان عالبيوت
وجعل شعاع الشمس خيط عنكبوت
وحجات كتير بتموت في برد الشتا..
لكن حاجات اكتر بترفض تموت....
عجبي
طول عمري بيني و بين الشتا مفيش عمارما بنقبلش بعض خالص يعني انا أول ما الشتا يدخل تلاقي جالي اكتئاب و ببقي مخنوق جدا وهو كمان ما بيستلطفنيش يعني تلاقي اول ما يدخل يجيبلي التهاب في وشي و ببقي عامل زي البطه المسكوفي - محدش يسال مين مسكوفي ده عشان معرفوش - فتلاقوا العلاقه متوتره ده غير طبعا انه بيجي مع بداية الدراسه وزي ما كلكوا عارفين اني شاب مجتهد و محب للعلم واللي بيتعلموه فتلاقوني في غايه السعاده - علي رأي عم يحي الفخراني ...الجو منعش و جميل أنا في غايه السعادة - وببقي نشيط جدا في الشتا لدرجه اني بدخل في بيات شتوي وبيبقي عدد ساعات نومي قول خماشر تماشر ساعه في اليوم
يااااااااااااه فكرتوني ليه ان الدراسه بكره ..............هرجع تاني لمشوار حلوان اللي يهد الحيل -أنا مسميها الهجره الي الجنوب -عارفين رغم ان شمس حلوان ماشاء الله تحسوا انها اكبر من الشمس بتاعتنا قد تلت اربع مرات لكن مع ذلك بردو بحب الصيف عن الشتا يعني لو عملوا الدراسه في الصيف كان زماني متخرج من سنتين مثلا ....ده كفايه الامتحانات بتاعت نص السنه اللي بتبقي في عز التلج ده انا في مره كنت بمتحن في الدور الخامس وكنت عطشان قمت اشرب من كولدير ولحظي كان شغال -بقي طول الصيف عطلان يجي علي حظ اهلي يشتغل في الشتا - من كتر السقعه اللي كانت ايديا فيها مكنتش قادر اكتب حاجه وكنت بدعي ان الامتحان يخلص
أنا فاكر اول يوم ليا في الكليه كنت بقي رايح ومتشيك ولابس اللي عالحبل داخل كليه بقي طبعا مكنتش رحت الكليه قبل كده ده طبعا لأني شاب نشيط المهم بسذاجتي رحت راكب لأقرب محطه مترو وعملت اكبرغلطه في حياتي وركبت المترو طبعا القميص المكوي بقي فوطه لمسح العربيات والجزمه البيضا بقيت كحلي ومنساش الشاب اللذيذ اللي حس فيا بحنان الام ونام علي كتفي وانا واقف ولا الموظفين اللي راكبين المترو مش عارف بيحبونا كده ليه تحس انه اول ما يشوف طلبه من الجامعه انه عايز يقوم يول في اهاليهم ...........نسيت اقولكوا اني اتاخدت غرامه في اول يوم لاني كنت قطعت تذكره وقلت للراجل حلوان قام اداني تذكره بخمسين قرش - ايام الرخص بقي -وكانت حلوان ساعتها بسبعييييييييييييييين قرش - ثروه يعني- المهم احط التذكره في المكنه تذمر وانا بهبلي مش اعدي ورا اي حد وخلاص لأ رحت رايح للناس اللي بيبقوا لابسين ازرق دول وسألته هي التذكره بتذمر ليه قام واخدها مني ومدفعني غرامه عشرة جنيه وبريزه - طبعا البريزه قبل العشره جنيه -وانا ساذج بقي رحت دافع علي طول المهم طلعت من المترو اسأل علي كليه الهندسه فواحد ابن حلال قابلني قالي بص انت تمشي في الشارع ده لحد ماتلاقي جبل كده تبقي وصلت كلية الهندسه مشيت قد تلت اربع تيام بلاد تشيلني وبلاد تحطني لحد ما لقيت الجبل بسال عالكليه لقيت حاجه كده تحص انها من مخلفات الحرب العالميه ومكتوب عليها كلية الهندسه قلت شكلنا هانقضي ايام زي الزفت ..........وقد كان
سبحان الله أنا كنت ناوي اتكلم عن الشتا وحبي ليه معرفش قلبت دراسه ازاي
عادي بقي

23 Comments:

Blogger taty said...

سبحان الله
أنا بقا بكره حاجة اسمها صيف
حر و قرف
انما الشتا حاجة تانية
انا بحب شعور البرد نفسه
و بموت في الجو و هو مغيم
ببقا في اقصى لحظات سعادتي
وكله كوم و اللحاف كوم تاني
بعشق حاجة اسمها لحاف
و محبش اتغطى ببطاطين بحب اللحاف عشان اللحاف اول ما تتغطى بيه بتحس بالبرد شوية كدة انا بقا بحب جداً الشوية دول
و بحب أشرب حاجات ساقعة في الشتا
و احب آكل ايس كريم في عز البرد
و لبس الشتا
بيبقى جميل و شيك كدة
انا سعيدة جداً إن الصيف خلاص قرب يمشي
اما بالنسبة للمترو فأنا بحبه جداً برضه
اكتر وسيلة مواصلات بحبها
فكرتني قريب كنت مروحة و التذكرة وقعت مني
واتكسفت اقول لأي واحدة عديني وراكي مع اني كل ماركب المترو بعدي واحدة ورايا
رحت رايحة للراجل اللي لابس ازرق دة و قلتله التذكرة وقعت مني
قالي ادفعي غرامة 10 جنيه
قلتله ماشي ادفعها فين
قالي ليا
قلتله ليه هو انت اللي بتاخد الغرامة
لما لاقاني بقا بفتح الشنطة و هدفع راح معديني و قالي خلاص
بعد كدة ابقي خلي بالك من تذكرتك
قلتله يعني مش هدفع الغرامة قالي لأ
و دي حكاية من حكاياتي مع المترو

9/17/2006 05:47:00 PM  
Blogger Nouran said...

ايه يا عم ده انت كرهتني ف هندسة بتاعتكوا دي احنا الكلية عندنا مرفهه بقى بالنسبة ليكوا ولا ايه
انا اتعذبت النهاردة ف المواصلات عذااااااااااااب لا بجد كرهت نفسي هنزل امتى يعني الساعة 7 حاجة تقرف
بس والله معندكش حق ف حكاية الشتا دي دي احلى حاجة فيها البررررررررد والتكتكة يا سلام وع راي تاتي اللحاف كوووم تاني لا ولما تاكل ايس كريم والدنيا بتمطر وسقعة يا وتعيى بعديها يا حلوة بجد
بس اسخف حاجة عندك بصراحة المترو ربنا يصبرك شد حيلك علشان تكون اخر سنة السنة دي يا هندزة وتترحم من العذاب ده

9/17/2006 09:27:00 PM  
Blogger wanna b a bride said...

أجمل حاجه في الموضوع ده
الجزمه البيضا اللي انت كنت رايح بيها الكلية أول يوم

هو لسه فيه جزم رجالي بيضااا؟؟؟؟

يا بني دي انقرضت من أيام أنور وجدي

انت وارث واحده والا ايه؟

9/17/2006 10:22:00 PM  
Anonymous orsual said...

انا معاها برضه في حكاية الجزمة البيضة دي :)

9/18/2006 01:29:00 AM  
Blogger حــلم said...

متهيألى انها كانت كوتشى يا جماعة
ما تظلموهوش
!!!

انا كمان باكره الشتا حتى بعد ما خلصت دراسة
بيجيلى اكتئاب على طول
ثم انى ساعات باحس ان كل هدوم الدنيا مش مدفيانى
جاكتات فوقيها شيلان فوقيها كوفيات
بابقى كرنبة

اسلوبك فى الكتابة يا نور زى السكر
ضحكتنى .. وجه فى وقته

9/18/2006 07:06:00 AM  
Blogger film69 said...

معقولة يا عم نور
دخلتك على الشتا كده ضلمة وعلى الكلية ضلمة
وكمان مش عجبك حلوان ؟ا
نعدي الكام سنة دول على خير ونخلص :)

9/18/2006 10:40:00 AM  
Blogger taty said...

نور أنا كان نفسي أسألك على الجزمة البيضا برضه بس اتكسفت قلت بلاش أحرجه
قول بقا هي كانت كوتشي و الا ايه؟

9/18/2006 12:40:00 PM  
Blogger NoOR said...

البيان رقم واحد :-
.
.
.
.
.
.
.
.
.
بسم الله

بناء علي طلب الجماهير فقد قررت الافصاح عن هوية الجزمه

أولا: كلمه جزمه في اللغه- أي حذاء- تصلح لكلا النوعين الرياضي -الكوتشي يعني - والكلاسيك

ثانيا : كانت كوتشي واديداس كمان وللدقه اتسرقت وانا بصلي في جامع الكليه ..........مش قلتلموا كليه تقرف

9/18/2006 02:15:00 PM  
Blogger NoOR said...

تاتي : هو انا بحب الشعور بالسقعه بس بجد بيجيلي اكتئاب في الشتا اعمل ايه
قدري

علي فكره انا بتغطي باللحاف لغايه شهر سبعه ...... حتي اسالي سويدي

اما متعة حياتي ايس كريم علي قصر النيل في شهر اتناشر

لو سمعتك بتشكري في المترو تاني ممكن تبقي قطيعه وزعله كبيره انا مفيش حاجه بكرهها في حياتي قد المترو و جامعة حلوان

9/18/2006 02:20:00 PM  
Blogger NoOR said...

نوران : ازيك عملتي ايه في الكليه ايه رايك في هندسه ........اكيد جامده و زي الفل

9/18/2006 02:22:00 PM  
Blogger NoOR said...

wanna b a bride:

علي فكره الجزمه دي ورث عائلي و تقليد في العيله لبسها اول يوم في الجامعه :)c

9/18/2006 02:23:00 PM  
Blogger NoOR said...

orsual:
لو زعلان ممكن اسلفهالك لفه

9/18/2006 02:23:00 PM  
Blogger NoOR said...

حلم : انتي اللي فاهماني في العالم دي

مش عارف من غيرك كنت عملت ايه

ربنا يخليكي للغلابه اللي زيي

انتي عارف انا خليت ابويا جابلي جاكت من امريكا تقريبا بيستعمل في الاسكيمو بس ...........كل ده علشان ابقي مطمن اني مش هاسقع اصل الموضوع ده وراثه عندنا ده ابويا وهو مسافر امريكا السنه دي في شهر سبعه واخد معاه بالطو و بلوفرات

الله يكرمك علي البقين الحلوين دول

9/18/2006 02:28:00 PM  
Blogger NoOR said...

film69

والله يا استاذي نفسي اخلص بس هما في الكليه بيحبوني قوي وعايزني اقعد معاهم

بس بجد اقعد في حلوان يومين وتعالي احكيلي

9/18/2006 02:30:00 PM  
Blogger Nouran said...

انا كتبت بوست عن الكلية انت نايم ولا ايه؟؟
يا عيني اتسرقت واديدس ده كان يجيلي سكته قلبية هروح ازاي -تعرف انا رحت اول يوم برضه بكوتشي اديدس ابيض هههههه بصرة يا نور- انا بحط الكوتشي بتاعي جنبي وانا بصلي بلزقه جنب الحيطة علشان اطمن

9/18/2006 05:12:00 PM  
Blogger bosbos said...

قال ايه لو كانت الدراسه في الصيف كان زمانك خلصت من سنتين بطلو تلاكيك بقى

انا بموووووووت في الشتا نفسي السنه كلها تبقى شتا و احلى حاجه في الدنيا المذاكره في الشتا بالليل يااااه تحت البطاطين كده و تاخدلك تعسيله و
الكتاب في ايدك تصحى تاني يوم

انت عارف الشتا اللي فات كنت راجعه انا و خطيبي من بره اول ما وصلنا عند باب العماره الدنيا بدات تمطر قلتله مليش دعوه انا عايزه امشي في المطره شويه و فضلت الففه في الشارع لحد ما بطلت و غرقنا:)))

انا فاكره اول يوم كليه ماما ودتني لحد باب الجامعه قابلت تاتي و اخوها خدنا عملنا جوله سياحيه في الكليه عرفهالنا حته خته عشان منسالش حد و يتوهنا بس انا كنت لابسه جراي

هههههه انا عملت بوست مع نفسي هنا

9/18/2006 06:20:00 PM  
Blogger taty said...

ايه يا نور دة
بتتغطى باللحاف لحد شهر 7 ليه؟
انت غريب يا بني و الله
و كمان انا بحب المترو عشان أنا بركب المترو الحلو اللي هو خط شبرا و الجيزة دة
إنما أنا بكره مترو المرج حلوان دة
و مش بحب أركبه طبعاً دة بشع و على طول زحمة

9/19/2006 03:16:00 PM  
Blogger saso said...

زهر الشتا طالع فـي عز الشــتا
أدور انا بقي علي زهر الشتا دة مفيش
اصحي من النوم القي الشجرة المسكينة وقعت نص ورقها علي الشباك اقفلة بلا نكد،، ادخل القي القطة متكومة في البطانية بتاعتها ومش راضية تاكل، اقول معلش اهو دايت
ابص للسما القاها مغيمة ومش منظر صبح خالص .. اشد الغطا وانام
غير يناير الشهير وامتحانات التيرم
مش قادرة افهم اصلا فين شاعرية الشتا دي
نـور هتبدأ البيات الشتوي امتي بعد رمضان؟

9/20/2006 03:38:00 AM  
Blogger kalam 7or said...

معلش انى دخلت عليكم من غير استئذان بس والله اسلوبك شيق جدا وبعدين انا عاوز اقول انى بتمنى ان انا اهاجر فى بلد لا ترى الشمس من كتر كرهى للصيف ، وبعدين كمان انت فكرتنى ايام ما كنت فى جامعه حلوان مع انى ساكن فى المعادى بس كنت بحس انى مسافر للجامعه وخصوصا بقهع لما تعرف انى كنت فى حقوق ( قبل ما اترفد) وكنت بكره اروح لغااااااااية حقوق فى اخر الجامعه يا راجل انت اللى كيلان وموش عاوز تروح الكليه وبعدين هندسة تحفة معماريه فى قلب حلوان !!!!
وبعدين كمان مرة واخر مرة انا دلوقتى بروح اكاديميتى اول اسبوع مخصوص علشان اتفرج على الطلبه الجدد وهما داخلين وفرحانيين ومعاهم السندوتشات والشنطة والزمزمية والقميص المكوى يا سلام فكرتنا بالذى مضى وولى الله لا يرجعه تانى

9/20/2006 03:51:00 AM  
Blogger NoOR said...

نوران : معلش اصلي مش متابع البلوجز اليومين دول ومش فاضي اقعد علي الكومبيوتر

بسبس : تقصدي ايه بالكلام ده اصدك ان انا فاشل .........الله يسامحك :)
انا كمان بحب امشي تحت المطر بس في اسكندريه مش في القاهره اصل هنا المطر بتلاقيه نازل اسود وبيبقع الهدوم

تاتي: اه والله بتغطي باللحاف لغايه شهر سبعه اصلي مبحبش اسقع خااااااالص

ثانيا المتروهين انيل من بعض ...مع احترامي طبعا لرأيك

9/20/2006 02:03:00 PM  
Blogger NoOR said...

ساسو : ايه الكلام الجميل ده

ايه رايك نعمل جمعيه للبيات الشتوي للناس اللي زي حالاتنا كده

انا عابدأ بعد رمضان ان شاء الله

9/20/2006 02:05:00 PM  
Blogger NoOR said...

كلام حر : انت تنور في اي وقت يا باشا البيت بيتك خصوصا طالما كنت من معذبي جامعه حلوان

9/20/2006 02:06:00 PM  
Anonymous veto said...

bmnasbet el gazma 2ana 2a3raf etneen as7abak 3andhom kadr kbeer gedan mn el zaka2 3rfo en gazmtak etsara2t we we bardo 7ato gezamhom fe nafs el makan we etsara2o bardo

9/22/2006 12:50:00 AM  

Post a Comment

Links to this post:

Create a Link

<< Home