الحق نفسك ....الفرصه لسه قدامك

أيها السادة بيان هام :- لقد بلغ السيل الزبي ولازم اقولها و أقف قصاد الظلم ده لازم يبقالي موقف لازم اقول الكلام اللي واقف في زوري من زمان قبل ما ناس تانيه يجرالها اللي جرالي خصوصا بعد ما لقيت الميل ده جايلي............... قلت مينفعش يعدي كده لازم تقروه وتعرفوا معاناة الشباب المسكين اللي كل ذنبه في الحياه انه جاب مجموع في الثانويه العامه واتهبب علي عينه ودخل هندسه..........وطبعا بحب اهدي البوسط ده لنوران وكل الشباب المسكين اللي لسه داخل هندسه و هايقضي احلي خمس سنين-مشيها خمسه - في حياته في السجن ده . دي تقدروا تقولوا عليها شهاده للتاريخ علشان محدش يقول مكنتش اعرف ان هندسه كده - اللهم هل بلغت اللهم فاشهد - أنا عملت اللي يمليه علي ضميري واقدر انام وانا مستريح ومرتاح البال ومطمن علي الجيل الجديد

الأب يقرأ الجورنان في صمت .....معالم الأهتمام واضحه علي ملامحه

صوت من اخر الشقه يقترب :بابا بابا بابا

يخطلت بصوت وقع أقدام صغيره مسرعه علي الأرض يلتفت الأب الي مصدر الصوت فيري حماده أبنه الصغير قد وصل إليه ..... يترك الجورنان من يديه و يسأله مسرعا و قد أمتزجت معالم الأهتمام علي وجهه بمعالم الخوف و التوتر

الأب : في أيه يا حماده .... ماما تعبانه؟

حماده(بينهج): ماما ذي البمب يا بابا

ألأب : أمال أيه .... أختك أكلت المشابك تاني؟

حماده(بينهج أقل):لأ يا بابا بابا ...... دي عند طنط زوزه بتلعب مع اولادها

الأب(متعجبا): أمال أنت كسرت أيه؟

حماده : مكسرتش حاجه والله حتي أسأل

الأب (يصرخ في وش الواد): أمال في أيه يا ابن العبيطه؟

حماده: ولا حاجه يا بابا ....... أنا بس كنت عايز أقولك أني عايز أطلع راجل يا بابا

الأب ( أنشكح من الواد و أنجعص في الأعده ): يبقي لازم تدخل هندسة القاهرة ذي باباك و تبقي مهندس كبير قد الدنيا و نتفشخر بيك انا و مامتك أقدام اللي يسوي و اللي ميسواش أفتح بقي التليفزيون لما أوريك الأعلان بتاعها

يجري حماده علي التليفزيون و يفتح المحطه و للحظ السعيد الأعلان لسه بيبدأ

مذيع : عايز أبنك يبقي راجل ( يرد صوت جهوري أجش قادم من بعيد): هندسه القاهرة

المذيع: يبقي الباشمهندس ( يرد نفس الصوت) ....هندسه القاهرة

المذيع: تتفشخر بيه قدام أصحابك ...هندسه القاهرة

يحققلك أحلامك ...هندسه القاهرة

يعرف معني المعاناه ...هندسه القاهرة

يعرف يعني أيه حرمان... هندسه القاهرة

ينسي يعني أيه اعياد ...هندسه القاهرة

يعرف معني المواصلات ...هندسه القاهرة

يتنشل في الأوتوبيسات ...هندسه القاهرة

يأتب من الرسم ...هندسه القاهرة

يتعمي من نقل الشيتات ...هندسه القاهرة

يشوف الذل قدامه كل يوم ...هندسه القاهرة

عايزه مينمش الصبح... هندسه القاهرة

ولا حتي بليل ...هندسه القاهرة

تحب مينمش أصلا؟... هندسه القاهرة

و يلعن اليوم اللي شافك فيه ...هندسه القاهرة

هندسه القاهرة تضمن لكم الحصول علي شهاده بكالوريوس الهندسه و كارنيه نقابه المهندسين

مع شهاده معتمده من السرايه الصفرا

طبعا الراجل ده شكله كده ماشفش بقيت كليات الهندسه والا كان عرف ساعتها انه في نعمه واكيك اكيد مكنش في ميكانيكا و الدليل علي كده انه لسه بيعرف يكتب

الظاهر يا جماعه ان الخير كتير الباشمهندسه لووني ندي كانت عامله في البوسط اللي فات بتاعها وصله تريقه علي شباب المهندسين قلت اوريهالكوا بالمره وبكده ابقي عملت اللي عليا وزياده اي حد يقول مسمعتش مكنتش اعرف براحته بقي

الكلام للووني ندي
قررت أهيس معاكم شوية بنوادر اجابات طلبة هندسة الكرام عشان تطمنوا على مستقبل البلد
سؤال عن نسبة الفراغات في عينة أسمنت ؟ اجابة البشمهندسة نسبة الفراغات مية في المية . العينة هوا يا جدعان
سؤال عن طول سلك كهربي مشدود بين عمارتين بعدهم عن بعض خمسين متر ؟ اجابة البشمهندس متين فدان و كسر
سؤال عن عدد الجمالونات التي عليها كوبري ؟ اجابة البشمهندس صفر . الكوبري طاير في الهوا أصله أرش
سؤال عن الكثافة النسبية لسائل ؟ كثافة الهوا أتقل من السائل . يعني كوباية البشمهندس المية فيها فوق و الهوا تحت
سؤال عن احتمال رمي زهرتين في وقت واحد . ايه الاحتمال ان مجموع الرقمين اللي على الزهر يطلع اتنين؟ اجابة البشمهندسة تلات احتمالات (واحد و واحد) ( صفر و اتنين ) ( اتنين و صفر ) معلش ملهاش في الطاولة

أدي كلام لونلي ندي من بوسط عرض خاص تلاتة في واحد

بي اس - بقلد لست ادري اشمعني هي يعني هاريانا بي اسات - معلش بقي أ صلها هي كمان هندسه

الشهادة بتاعت السرايا الصفرا ضاعت مني وعايز اعمل بدل فاقاد أعمله منين لحسن بقوا يوقفوني في الكمين بالليل وانا معايش الرخصه واحتمال يسحبوا الجزمه وامشي حافي

طلب اخير : يا مهندسين العالم اتحدوا

ايه رايكوا نعمل بيان نشجب وندين ونرفض فيه الاعمال الغير الانسانيه الواقعه علينا نحن الباشمهندسين الغلابه ونوديه الامهات المتحده ونطالب بوجود قوات طوائ دوليه في كليات الهندسه واعتقال جميع العمداء والكاتره والمعيدين والطلبه بالمره جت عليهم حتي البلد تنضف شويه بلا هم ....................آل هندسه آل كتكوا القرف مليتوا البلد

لسه فايت علي البلوج بتاع لست أدري ولقيتها كاتبه بوسط أسمه بقولها علنى: أنا مش غبية و لقيت و لله الحمد ان في كميه مش بطاله من الباشمهندزين الناقمين علي الوضع وبكده نقدر نقوم بالحركه المباركه ونخلص من النظام اليكتاتوري ده -شكلكوا فهمتوني غلط - أنا بتكلم علي الكليه مش حاجه تانيه

طلب تاني لو مافيهاش رزاله: الي أهل الخير ................أكفل مهندس واتبرع ولو بدولار تعاطفك لوحده مش كفايه

بي اس - تاني حد عنده مانع بلوجي وانا حر فيه-: أنا اتزليت علشان انزل صوره مع البوسط وفي الاخر قررت انزله من غير صور خالص لو حد عنده اي معلومه في الموضوع ده ياريت يفهم الشاب المسكين اللي هو أنا