شئ اسمه الميد تيرم

حد يقدر يقولي ايه لازمة ام امتحنات التيرم والميد تيرم في الوجود غير الاخصاء علي البقيه الباقيه من كرامتنا الادميه في امتحنات تمثيليه سخيفه لا فائده منها غير دروس المراجعه لاصدقائنا المعيدين - معلش يا اخوانا ما انا تلاته من اصحابي اتعينوا معيدين- مش قر والله لكن انا قرفت ...........يعني ايه امتحن ست مواد في اسبوع واحد اطلع من امتحان اروح وانام شويه واصحي الحق اذاكر كلمتين علشان الحق انام علشان الحق اصحي علشان الحق امتحن و هكذا دواليك - دواليك يعني مرارا وتكرارا مش المقصود بيها دوالي سيادتك-لأ والادهي اني المفروض افضل متماسك لآخر الأسبوع ...............هاهاها ده عند أمه يا أدهم -الله يرحمه اللمبي مكانش عارف ان جمله هتبقي اقوال مأثوره -ه

انا يا دوب قدرتي الاستيعابيه تدوم لاول تلت امتحنات بعد كده بتحول الي انسان مبرمج اروح اخد ورقه الاجابه واكتب اسمي وسلام

الانكت بقي وانت بتتفرج علي ورقه الاسئله تلاقيهم جايبنلك تمن ورقه تحس ان الدكتور كان مبرشم عليها الاسئله عشان ما ينساهاش و كاتبلك فيها اكتب كل اللي تعرفه عن الماده نسيت اقولكم ان الزمن ساعه ونصها بيضيع علي ما ورق الاسئله يجي وما ينفعش يمد الوقت عشان اللي بعدك

بالمناسبه لو حد فاضي فيكوا قد ساعتين تلاته كل يوم يبقي يقرالي سوره يس و يدعي ربنا يهديني و اقعد اذاكر بدل العك اللي انا فيه..يا دوب بقي الحق ادخل انام فاضل علي الامتحان تلت تيام الحق انامهم عشان اروح فايق

اعتذار

كاالبيت المهجور مدونتي الحبيبه بعد غيابي عنها قرابة الشهرين بدون سؤال عنها وعن أحوالها و كأن لم يكن بيننا سابق عشره و موده أكثر من تلك التي بيني وبين اعز اصدقائي .............صديقتي العزيزه اعتذر اليك من صميم قلبي عن هذا الجفاء الدي نما مني تجاهك ولكن حين تعلمين مدي مراره احساسي بالذنب تجاه هذا الهجر ستجدي لي العذر فيما بدا مني............وا صديقتاه انتي الملجأ الأمن لي من احاسيس الجنون التي تراودني حاليا و مراره الاكتئاب خصوصا مع دخول فصل الشتاء المرعب - بالنسبه لي علي الاقل - اكتب اليك علي انغام (من أول لمسه) لمطربنا المفضل محمد منير والذي طالما اشجيتيني بسماع أغانيه المفضله لنا خلال تصفحي لردود زوارنا الاعزاء و الرد علي تعقيباتهم وابعث اليك من خلال كلمات اغانيه العذبه اعتزاري عن غيابي عنك و الذي كان غيابا عن نفسي و هربا من مراره هزائمي المتواليه في هذه الحياه التي لم يهونها علي الا وجودك في حياتي

لو تعلمين مدي شعوري بالغربه في هذه الدنيا بدونك و كيف اني كتبت في رأسي الف خطاب و خطاب لأعتذراليك بهم عزيزتي تعالي لنبدأ من جديد توحدنا الذي طالما احببنا الحياة من خلاله و لتصلي لله من أجلي لكي استطيع مواصلة الحياه في هذا الكون العجيب

صديقك المخلص الي الأبد

نور