العرب ظاهرة صوتية

فلا حَدٌّ يُباعدُنا

ولا دينٌ يُفرّقُنا

لِسانُ الضّادِ يجمعنا

بعدنانِ وقحطان

ايه رأيكوا في البقين دول مش عارف ليه افتكرتهم وانا بتكلم مع ناس أصحابي عن الفرق بين الاتحاد اللأوروبي و الكشري ابو دقه طبعا هناك أوجه شبه كثيييييييييره بين الاثنين وأهمها ان الاثنين مش الوطن العربي

وطني حبيبي الوطن الأكبر

يوم ورا يوم امجاده بتكبر

وانتصاراته

انتصاراته آآآآآه هنا مربط الفرس فنحن وطن ينتصر بالجعير - لامؤاخذه- أصل ده التصريف التالت من الفيرب جعر - جعر يجعر تجعيرا - ما علينا فالجعير هو الزعيق الغير مفهوم المعني - حسب وصف ابن بارم دليه في معجم اتوكسعلي خيبتك المحيط في باب يا داهيه دقي - فمن محاوله هدم باب المغاربه للمسجد الأقصي لمحاولة النيل بالمجاهده هاله هانم سرحان -لحفظ الرتب- يا قلبي لا تحزن فلقد قامت الجموع الغفيره بلطم الخدود وشق الجيوب من أجعل سمعة بنت المعزطيب الله ثراها القاهره

بنت المعز القاهره

حتي الصباح ساهره

آل ايه سمعة مصربتقولوا ايه يا ولاد سمعة مصر بقي وجود هاله هانم سرحان لوحده مش اساءه لسمعة مصر و سكوت الأخت الكبري في وجهه محاولات هدم الأقصي ده قمة الارتفاع بسمعة مصر.

طبعا نسيتوا الدنمارك و الرسوم المسيئه .......علي النعمه شعب عنده زهايمر عموما ربنا يكرمكوا وتفتكروا العباره والقطر والقصر و أكياس الدم وانفلونزا الطيور واللي للعلم بيتقال انها دخلت مصر عن طريق علف مستورد احييه ياأبو سوسو .......بتستورد علف الله يرحمك يا سعد باشا ما هو قالها قبلي

مفيش فايده

بي اس :- أنا كنت كتبت البوسط ده قبل كده و حبيت اعدل فيه لكن منه لله بلوجر بعد التعديل مطلع عيني لا عارف اكتب كومنت ولا بوسط....... لكن الحمد لله ربنا هداه وفتح معايا

نسيت اقولكوا ايه هي علاقة الاتحاد الاوروبي و الكشري بقي يا سيدي بما أن الكشري عباره عن خليط من حاجات كتير زي العدس و الرز والمعكرونه - علي رأي اشقائنا اللبنانين - وبما ان الاتحاد الاوروبي كمان خليط من لغات مختلفه وديانات مختلفه وحاجات كتير مش شبه بعضها ولكن ويال العجب بقي اتحاااااااد اوروبي ولكن العرب اللي معظمهم مسلمين وكلهم عرب وبيتكلموا عربي- ياااه رقاصه وبترقص غريبه دي -لكن سبحان الله مش عارفين يبقوا اتحاد عربي

Valantenoooooooo

كل فالنتين والأمه الاسلاميه والعربيه بخير

طبعا بما اني شاب رومانسي عالاخر وبما اني في كامل وعيي لدرجه اني اتخضيت لما عرفت ان احنا بقينا في شهر فبراير (شهر الحب) - منه لله اللي كان السبب - فوجئت النهارده و انا عالقهوه بالواد شريف صاحبي جاي وماسك علبه حمرا

سألته ايه دي

هو( باستغراب وكأنه بيكلم واحد مجنون)-هديه الفالنتين انت ايه مش عارف ان النهارده 14

أنا (وعلامات البله علي وشي )- اربعتاشر ايه

هو (بعدأن تأكد اني مجنون) -اربعتاشر فبراير يعني هايكون اربعتاشر اكتوبر

أنا - ياااااه ده علي كده عيد ميلاد اخويا فات من اسبوع

هو (بقرف) - كل سنه وانت طيب

طبعا خلاصه الكلام اكتشفت اني كنت نايم يجي اسبوعين من ساعه ما خلصت امتحانات الترم لأ والأدهي اني اكتشفت اكتشاف رهيب ان الدراسه ابتدت من اسبوع من غير ما حد يقولي مع اني مش موافق عالكلام ده ازاي يبتدوا الدراسه والشعب بيحتفل بالعيد القومي للحب الصراحه ان مضطر اقولها و أمري عالله

اتنيلوا علي خيبتكوا

بقي شعب مش لاقي ياكل ونصه تحت خط الفقر وبيجيب هدايا بالملاين للفالنتين طب اتحدي ان حد من اخوانا الحبيبه يكون عارف مين الحاج فالنتين ده

نسيت أحكيلكوا علي كميه الاحمر اللي كانت في الشارع انا قلت الاهلي خد كاس العالم ولا ابو تريكه كان بيطاهر ابنه

و في الختام احب اهديلكوا اغنيه ايها الراقدون تحت التراب

ابقوا سلمولي عالحاج فالتنينوا كتير وقلولوا الواد نور بيقولك ماتبقاش تعوق علينا لحسن بتوحشنا

بس الصراحه عندي اعتراف صغنن قااااااااااد كده انا لما شفت ان الواد شرشر -شريف يعني - المزه بتاعته جابتله ساعه بحوالي تمنميت تسعميت جنيه قلت مش كان زماني جايلي حتة عربيه صغننه هديه الفالتنين

جاتنا نيله في حظنا الهباب

ممنوع ركوب ولاد أبو اسماعيل

نازل في امان الله الصبح رايح المكتب وانا سايق ابص الاقي التاكسي اللي قدامي كاتب عالقزاز ممنوع ركوب ولاد ابو اسماعيل ..........الشعب بتاعنا اتهبل ياااااااااامينز ابسترف اس

- وانا بوضب المكتب في امان الله وو اقف مع السباك الاقي خير اللهم اجعله خير حد بيخبط عالباب و ناوي يهده فتحت الاقي راجل الخالق الناطق عم ايوب جاي عايز يتخانق معايا وماسك عصايته وهايضربني بيها خدت منه العصايه وخفت المسه يطب ساكت اروح فيه في داهيه.... المهم خدت العصايه وقمت مزعق فيه وم ظبطه لقيته بقولي انت ابن الدكتور (......) انت بتشتمني - فين البربطوظ ولا انت مابتجيش غير بالشكليته- انت بتضربني - كلكوا عليا ولا ايه - انا هاجيب ابوك يهزقك ده علي اساس ان انا شتمته وضربته وخدت منه العصايه- خد العصايه هاتولي العصايه- صحيح نسيت اقولكوا كان جاي يتخانق ليه اصل لامؤاخذه السباك وهو شغال كان مولع انبوبه بوتجاز في الجنينه وخير اللهم اجعله خير سودت الرصيف .ازااااااااااااي بقي يسود الرصيف السباك قاله هنضفه ليه وليه يرد عليه جاي ياخده يوديه البوليس بتهمه الرد علي جنابه

علي النعمه الشعب ده اتهبل رسمي

تخاريف شتويه

لا أعرف ماذا سيكون في السطر القادم ولكني سوف اكتبه ...اكتب لأخرج من هذا الشعور العجيب فهو مزيج من الفراغ والاكتئاب والاحساس القاتل بالملل لا اعرف ماذا حدث لحس الفكاهه المزمن الذي اصبت به في الطفوله والذي تطور لدرجه البله اليوم افتقد هذا الشعور بالسعاده المطلقه بون سبب ولا لشئ سعاده من اجل السعاده -ليت الشباب يعود يوما- كنت قد بدأت في كتابه خواطر من اجل البوسط الجديد في دفتر ورقي وذلك بعد اربع محاولات فاشله لتذكر ما كنت قد قررت كتابته في الايام السابقه و لكن حتي هذه الخواطر لم تكن دافعا للكتابه . زمان كنت فاكر ان الاكتئاب مابيجيش غير في الشتا علشان قله الضوء و قصر اليوم لقيتها محصله بعضها و الغريب انني قررت الهرب من هذا الاكتئاب بالشغل لكن لقيت ان الشغل اول سبب لذيادة الاكتئاب قد اكون مكتئب لاحساسي بتسرسب الاصدقاء من حولي كل مهموم في وظيفته و مشاريع الخطوبه والزواج وانا زي ما انا من البيت للقهوه ومن القهوه للبيت