Tuesday, June 20, 2006

أوقات فراغ

منذ وقت بعيد لم اري فيلم احس في ابطاله اني اعرفهم مثل ما حدث عندما شاهدت فيلم أوقات فراغ الصراحه كنت حاسس ان الفيلم ده معمول عالناصيه عندنا-خصوصا لما لقيت مشهد متصور عندنا في شيراتون- بس فعلا الفيلم ده من الافلام اللي يتقال عليها افلام واقعيه نفس الفراغ بتاعنا نفس مشاكلنا. طبعا اول ما لقيت ان واحد من الابطال في كليه الهندسه و طالع عينه اتاكدت ان كاتب الفيلم كان مستقصدني لأ والالذ وهما جايبينه في المدرج والدكتور بيشرح بيقولهم
وعشان نجيب الاسقاط نعمل موازي عمود موازي - طريقه في الهندسه الوصفيه-وفجاه لقيته بيتكلم في الر سم الهندسي قلت عادي فلتت منه مش مشكله المهم طبعا الواد قرفان من الكليه و طبعا من غير زعل شكر في بنات هندسه علي الأخر .

الفيلم اجمل ما فيه اعتماده علي الشباب اللي بجد كنت حاسس اني اعرفهم قبل كده و اللذيذ انهم مبيعملوش اكتر من اللي اي واحد فينا عمله او بيعمله طبعا كنت عايز اقوم اخنق ابو احمد -اللي بيعد سنه تانيه تجاره- وهو بيزعقله عشان جاي متاخر وبيقوله ان عيب يدخل البيت بعد الساعه 12 -طبعا افتكرت واحد صاحبي وهو واقف نفس الوقفه- انا حسيت انهم بيعرضوا يوم لايف من حايه الشباب و الميزه ان التصوير في الاماكن اللي كلنا بننزل فيها فلفلهبتاع الفول و شارع جامعه الدول وقهاوي مدينه نصر ومصورين في وسط الناس طبيعي جدا

احلي مشهد المشهد النهائي و الساقيه بتاعت الملاهي عطلت بيهم وهما عمالين يتكلموا علي حال البلد وبيقولوا البلد فيها ناس لسه بيكمل الكهربا قطعت فبيقولوله ادهيم سمعوك اهم معلش ما يقصدش طب نزلونا ومش هانفتح بقنا...زقه يا ريس

وحياه ابوك تدينا زقه يا ريس
طبعا انا مش هاقول حاجه علي الاغنيه لان مفيش حاجه تتقال اكترمن انها روعه طبعا كلمات الأبنودي ملهاش حل والصراحه انا مكنتش سمعت لمروان خوري قبل كده بس الصراحه هوفنان محترم

Saturday, June 17, 2006

عن حنان ترك وفتاة الكشك اتحدث

أبشروا يا أهل الاسلام لقد أعزنا الله بحجاب حنان ترك ...................وكأن مشاكل مصر توحدت واجتمعت في حجاب الست حنان مابين مؤيد ومعارض وكأنهم يحاربون من أجل عوده العراق و فلسطين المشكله الحقيقيه لا تكمن في هذا الغطاء للرأس وكأن الدين تحول الي مجرد الحجاب .........لقد تحول هذا الشعب الي مريضنفسي يستعصي علاجه فنحن نتمتع بفعل العيب طالما لا يرانا احد ولكن يا سلام بقي قدام الناس نبقي حماه الشرف والاخلاق . اصبح الدين عندنا مناظر اللحيه والجلباب القصير ياسلااام شوف التقوي فتاه تردي نقاب بارك الله فيكي مع انها لابساه غصب عنها عشان ابوها متشدد امبارح ماشي جنب القهوه اللي بقعد عليها لقيت بنت منقبه لسه بقول لاصحابي مش عارف ليه بقيت اشك في المنقبات يدوب مخلصتش الكلمه لقيتها راحت ورا كشك وراحت قالعه النقاب و خالعه العبايه السودا الاقيها لابسه بادي ستومك و بنطلون اختها الصغيره اللي في اولي اعدادي الصراحه قرفت من كل حاجه قد كده الاستخفاف بالدين انه بقي مجرد ستار للانحلال بذمتكوا لو حد غير مسلم شافها هايقول ايه عالاسلام نرجع للست حنان المفروض انها مش هاتمثل غير اللي يليق بوضعها الجديد والا تبقي مفرقتش عن فتاة الكشك من حيث ان الاتنين مقضينها مظاهر

Saturday, June 10, 2006

حلم تايه

طبعا لسه ما خلصتش امتحانات بس للضروره احكام .........مش عارف اقول ايه الصراحه ما صدقت ان مالك الحمد لله خرج بالسلامه والحفله بتاعت غني يابهيه تمت علي احسن صوره وقلت ان شاء الله بخروج شرقاوي واللي معاه تبقي اخر الاحزان لكن تأتي الريح بما لا تشتهي السفن-ده علي اساس اني مركبي قديم- فوجئت وانا بفتح مدونه احلام وبقايا احلام انهم اتمسحوا من علي السيرفر الصراحه زعلت جدا لأني فعلا كنت بحب اقرا كلام احلام - وكمان كانت عامله لينك ليا عندها- مش عارف هي مسحت المدونات ليه الصراحه بس لو كانت عايزه تتاكد من انها مهمه عندنا خلاص ياستي ولا يهمك من بكره نعملك اعلان ونكتب فيه وحشتينا ونحطه علي كوبري اكتوبر بس هيبقي من ناحيه مصر الجديده عشان اقربلي مش ناحيه غمره او ممكن نغنيلك (عودي يا احلام ) بس كده ممكن بليه تزعل - كان عمرو دياب عامل اغنيه اسمها عودي يا بليه- ياريت يكون غلطه و تتصلح ونلاقي احلام منوره البلوج تاني - هلاقي مين تاني يعملي لينك عنده- ربنا يستر و مفتحش النت بكره الاقي حد تاني اختفي بس مش هاقولك اكتر من
حاسب من الاحزان و حاســـــــب لها
حاسب علي رقابيك من حبلـــــــــــها
راح تنتهي و لابد راح تنتهــــــــــي
مش انتهت أحزان من قبلهــــــــــا؟
عجبي !!!