ضربة معلم

مبروك يا شعب ال %30

90 = 175 L.E.

حراااااااااااااااااااااااااااااااااااااااااااااااااااااااااااااااام

الصراحه ضربة معلم و ابقي سلم لي علي التلاتين في الميه

عشر أسئله .....................بس

من حوالي قرن من الزمان كانت الأنسه ساسو .....مررت لي تاج و كالعاده نسيت لكن مش عارف ليه كان مؤرقني و كنت عاوز اعمله .........يمكن علشان فكرته لذيذه وداخله دماغي أو يمكن علشان هاقول اللي علي مزاجي من غير ما الاقي سؤال مستفز مضطر اجاوبه و ده لأن أنا اللي هاسأل ... لأ وكمان أنا اللي هاجاوب

هو كان في موضوع محيرني هو كان مطلوب مني ارتب الاسئله تنازليا من حيث الاهميه و بما اني ما فهمتش يعني ابداء من المهم الي ان اصل الي الاهيف و لا العكس فنمشيها بركاوي أحسن

السؤال الأول : اسمك وسنك وعنوانك ؟؟

معلش الافلام العربيه مأثره عليا

س : ياتري القطر بتاع الاعلان الشهير مصر بتتحرك هو هو نفس القطر اللي اضرب بالطوب في المحله ولا لأ؟

و يا تري الشباب اللي ركبوا القطر راحوا فييييييييييييييييييييييييييييييين .؟........سؤال تاني بسيط هو اللي ما لحقش مصر وهي بتتحرك ممكن ياخد تاكسي و يلحقها المحطه الجايه؟

س : يا تري علاوة التلاتين في الميه الشهيره هاتكفي الزياده بتاعت البنزين و من ثم المواصلات و لا الموظف ها يستلف علشان يروح شغله ؟

مع العلم ان رئيس الوزراء أحمد نظيف قال في كلمة في جلسة المجلس "التأثير لن يزيد على عشرة في المئة مما سيحصل عليه محدودو الدخل (من علاوة المرتبات)."

س: يا تري الحكومه هاتلغي الدعم علي الغاز اللي بتصدره لاسرائيل ولا ده ما بيشكلش عبئ عالموازنه ؟

س: ليه لما أي حاجه بتحصل في مصر الجرايد و التليفزيون بيسارعوا بنفي الحدث أو يطلعوا ان اللي عمله مختل عقليا؟

س: بقي ما فيش حاجه شاغله دماغ الحكومه الالكترونيه بتاعتنا غير الفيس بوك؟

تخيلوا الفراغ اللي و صلنا ليه لدرجه ان جريده بحجم الأهرام تعمل صفحه اسمها فيس بوك و تعمل حوارات مع واحد المفروض انه عالم ديني الذي أكد أن من يشارك في الاضراب آثم شرعاً وعم الحاج كان مقضيها فتاوي كانت ممكن توصل لدرجة انه يحرم الدخول علي الفيس بوك و لا الأستاذ المبجل رئيس الحزب اليساري المعارض يؤكد بم لا يدع مجالا من الشك ان الاعتصام عيب و ان الولاد اللي عالفيس بوك دول قله مندسه - و اضح ان البلد كلها قله مندسه - لأ و الظالم بيقولك ان الشباب المصري المشترك علي الفيس بوك قلائل -جيوش اثنتي عشرة دوله أوروبيه تسميهم قلائل- يا مفتري

س : ممكن حد يحل معايا المسأله الحسابيه العويصه دي .......شاب متخرج من الجامعه قول عنده 22 سنه و امه دعياله و ما دخلش جيش و الظاهر ان امه كانت دعياله ليله القدر و اشتغل بعد ما اتخرج علي طول و بيقبض أأأألف جنيه ان شا الله ماحد حوش و مظبط المزه بتاعته و متفقين عالجواز.....تقدر تقولي يتجوز وهو عنده كام سنه؟ علما بأن متر المباني لايقل بحالمن الأحوال عن الف جنيه و جرام الدهب قول ميت جنيه خد بالك ان كيلو اللحمه باربعين جنيه و الزيت باتنااااشر جنيه

س : اختار من بين الاجابات

العلاقه بين درجه الحراره وكميه القماش في هدوم البنات في الصيف ( طرديه - عكسيه - مالهاش علاقه )؟

س: ليه لم الناس تيجي تبيع عربيه يقولك استخدام طبيب ؟؟ يعني هو الطبيب بيعرف يسوق و المهندس لأ

س: كان في سؤال محيرني من زمااااااااااان .......يا تري هو أدهم صبري اتجوز مني ولا لسه؟ و يا تري لقي ابنه اللي مع سونيا جرهام ولا لأ ؟؟؟

س: يا تري لو الكابتن ماجد كان ساب فريق المجد و احترف في الفريق بتاع بسام كان الجمهور بتاع فريق المجد عمل معاه زي ما جمهور الأهلي عمل مع الحضري ؟

كلمتين لمصر

كل عين تعشق حليوة
و إنتي حلوة في كل عين
يا حبيبتي أنا قلبي عاشق
و اسمحيلي بكلمتين
كلمتين يا مصر يمكن
هما أخر كلمتين
حد ضامن يمشي آمن
أو مِـآمن يمشي فين
..........................
شابة يا أم الشعر ليلي
و الجبين شق النهار
و العيون بحرين أماني
و الخدود عسل و نار
و اللوالي ( اللؤلؤ) بابتسامتك
يحكوا أسرار المحار
يللي ساكنة القصر عالي
إيمتى يهنالي المزار
كلميني يا صبية
طال علي َّ الانتظار
كلمتين يا مصر يمكن
هما أخر كلمتين
حد ضامن يمشي آمن
أو مِـآمن يمشي فين
.....................
قصرك المسحور غيلانو
أغبى من دود الغيطان
بعد مص الغصن الاخضر
ينحتوا عضم العيدان
و اللي خلى الارض خضرا
و اللي خلى الدار آمان
عاش بجور ملو جوفه
مات بخوفه من الغيلان
طوّع الغلبان
ما قالش عن شقا العمر اللي كان
كلمتين بمصر يبقوا
هما أخر كلمتين
حد ضامن يمشي آمن
أو مِـآمن يمشي فين
....................
أدي كلمة من عذابي قلتهالك
باقي كلمة
من حنيني صنتهالك
في الضلوع من دنيا ظلمة
كنت خايف يلمحوها
يقتلوها في سكة ظلمة
سقسقت و النور بشاير
زهرة الصبار يا سلمى
يا نسيم الشوق يا طاير
خد لمصر في الصبح كلمة
طول ما يبقى الركب ساير
بالبصاير و العينين
يبقى ضامن يمشي آمن
يبقى عارف يمشي فين

كلمات : أحمد فؤاد نجم

كنت ناوي أقول كلمتين كومنت بس فعلا بعد الكلام ده خلص الكلام اللي أقدر أقوله انصحكوا تسمعوها من الفنان شربيني أحمد مطرب فريق نغم مصري ...........................حكايه

you Have Been Tagged

قاعد في امان الله لا بيا ولا عليا الاقيني لابس في تاج من البنوته اللي زي العسل ميويه واللي مش ها اقدر اكسفها لأنه أول تاج ليها

ربنا يستر

دخلت مجلس الشعب من اوسع ابوابه ايه هو رمزك الانتخابى المفضل ؟

الشاكوش ..................علشان اكسر بيه الروتين و البيروقراطيه وقبلهم دماغ الفاسدين

كنت تفضل الدخول مستقل او تتبع حزب معين ؟

أكيد وطني طبعا وانا عبيط ولا ايه امال هترستق في الكرسي كام دوره و اعملي قرشين ازاي .....و لا عاوزهم يلبسوني العمه و اخرج بفضيحه المطاهر يوم خروجه عالمعاش

اذا دخلت مستقل هل توافق على التوقيع للحزب الوطنى بعد نجاحك كمستقل ؟

بما اني اصلا قلت اني هادخل وطني و ده كان هزيان فاكيد مش هاوقعلهم انا هاوقع للناس علي تعهد اني افضل مستقل .....لحد اول قفا

ايه اول حاجه هتعملها لنفسك ولاسرتك ؟

جمعيه و اقبضها الاول علشان اصلح العربيه

ايه المشروع اللى ناوى تعمله لاهل دايرتك ؟؟؟؟ دون ذكر اسم الدائره ان اردت

بيتهيألي دايرتي الكبيره أهم

قعدت فى المجلس جنب نائب مميز . من هو النائب ؟؟؟

لو كان الحاج كمال الشاذلي موجود كنت قلت اقعد جنبه اهو الواحد يتقي لسانه

قدمت سؤال للحكومه ايه هو السؤال ؟

الاحساس نعمه

طلب احاطه موضوعه ايه ؟؟؟ وبتقدمه لمين ؟؟؟؟

للسيد رئيس الوزراء .....................انت لسه قاعد فيها ليييييييييييييييييييييييييه؟؟؟؟؟

استجواب لاتنين من الوزراء موضوعه ايه ؟؟؟؟وبتستجوب مين ؟؟؟؟

وزير التعليم العالي و الواطي ....لامؤاخذه
هو التعليم راح فين ؟؟؟؟؟؟؟؟؟؟؟؟؟؟؟

و لوزير النقل ........................معاليك اخر مره ركبت فيها اتوبيس نقل عام كنت في سنه كااااام ؟؟

هل انت مع الخصخصه ؟

أكيد بس لو ها يخصوا الي غلوا العيش و الحديد و الرز و الزيت وخلافه

هل انت مع قطع العلاقه مع اسرائيل ؟

يا راجال طب و ندي الغاز برخص التراب لمين للشعب لا سمح الله ....انت اكيد بتهرج

طب و الكويز ...نجيب زراير للفلنات اللي بنصدرها أمريكا منيييين

هل تؤيد الحرب على العراق ؟

تأيدي من عدمه لن يفعل شئ.............الحرب قامت و العراق خربت واللي كان كان

ممكن يبقي السؤال هل أنت مع الحرب علي السودان أو ايران أو سوريا أو حط أي بلد عربي يعجبك ؟

هل تؤيد مرور الامريكان فى القناه ؟

قناة .......تقصد ميلودي ولا مزيكا؟؟؟؟؟

هل انت مشترك فى مؤامره كسر فرنسا هانم بالاشتراك مع ام دبوه ؟

أعدمك لو كنت فاهم

بتمرر التاج ده لمين ؟

لأي شاب أو فتاه له نفس يعمله

Run Awy 7adary

هوي أصحابي ماعرفتوش ايه اللي حصل امبارح مش بيقولوا ان الحضري هرب علي سويسرا لأ وايه الجبان مخدش معاه عمو حسن حمدي لألألألألأ......أخص عليه صحيح

لامؤاخذه عالدخله الجامده دي أصل أنا لسه سامع بقين كنت هاموت بالسكته الكلويه - دي غير الذبحه المخيه- علي فكره

...........الأول:- أن أن أأأأأأأأأأأأأأأأأأأأأأأأأأأن تش

المحامي مش عارف اسمه ايه كده قال خير اللهم اجعله خير رافع قضيه يطالب بسحب الجنسيه من الحضري

يانهار طين ..........................غطيني و صوتي يا صفيه

سحب الجنسيه مره واحده

هو الراجل ده ما سمعش عن واحد اسمه رامي لكح لامؤاخذه- لامؤاخذه دي مش اسم جده علي فكره - الراجل ده للي نسي احب افكره انه لاهف قد كام مليون من فلوس الشعب الكادح- اللي هو احنا - وقاعد بيهم في المريديان اللي في باريس

هاتقولي ياد و اشمعني المريديان هاقولك يا ناصح اصله اشتراه...... لو سألت وقولت منين هارميك بره البلوج ده من غير زعل اصلي بكره السذاجه اكيد من الفلوس اللي حوشها في الغربه هو الكام مليون اللي لهفهم ياعني يعملوا ايه اليومين دول

تفتكروا عم رامي حبيب الكل ده ممكن نرفع عليه قضيه نسحب منه الجنسيه

طبعا في غير الراجل ده كتييييير أحق بسحب الجنسيه من الكابتن عصام الحضري

الثاني

مجله المفروض انها محترمه بتقول ان الحضري هرب ثروته اللي هي - علي حد قولهم حوالي تسعين مليون جنيه - لبنوك سويسرا

انا سمعت البق ده و قعدت ارفص في الأرض مش لأن الحضري معاه تسعين مليون جنيه - ودي واسعه حبتين- بس للهيافه اللي الاعلام بقي فيها

مجله اهيف كاتبه عالغلاف الحضري من كفر البطيخ لسويسرا ......... هو سويسرا مانعه الهجره من جمهوريه كفر البطيخ اليومين دول ولا ايه

المهم الغريب في الشعب ده وعلي رأي عمنا أبو النجوم أحمد فؤاد نجم في كتاب ليه مش فاكر اسمه و للأسف الواد شريف - ابن ال.......-خده مني وضيعه وهو في الجيش كان عم نجم كاتب فيه قصيده لواحد برضو مش فاكر اسمه كان كاتبها عن الحاجه والدته بيقول فيها

كانت لما تحب تحب صبابه

و اما بتكره تبقي ربابه
و ده ينطبق عالشعب بتاعنا من يومين كان الحضري السد العالي و يمكن بحيره ناصر كمان ودلوقتي بقي خاين وعميل ويمكن جاسوس وغالبا هو اللي جاب انفلونزا الطيور وعلي فكره هو اللي حرق القطر ...أقولكوا علي مفاجأم هو اللي مخبي السفينه بدر

مش هتصدقوا أنا سمعت بأم عيني - ايوه أم عيني -عاجبك ولا ترووح ...ان الحضري هو اللي غلي الزيت

هو أنا مقولتلكوش مش الزيت بقي بحداااااااااااااااااااااااااااااااااااااشر جنيه............ خمسه وسبعين قرش للدقه

لأ وكانت سوسه زعلانه قال ايه بقي بتسعه جنيه....طب ياااااااريت

طبعا اللي مخليني في حاله الهياج العصبي دي

ان رغيف العيش بقي بنص جنيه .....خمسون قرشا .......خمسميت مليم

اه والله كنت النهارده بجيب جاجات الأسبوع ....أصل أمي لقيتني قاعد جمبها زي البت البايره -لامؤاخذه يعني- قوم ايه قالتلي انزل هات الطلبات قمت خاطف رجلي ونازل علي السوق اللي في عين شمس يعني بتاع الناس الغلابه اصل انا لو جبت من شيراتون كان زمان ابويا بيشحت علينا دلوقتي قوم ايه لقيت كيلو الخيار بتلاته جنيه والفاصوليا بسبعه جنيه اه والله بسبعه جنيه بس الحمد لله بطلنا ناكل فاصوليا

والرغيف اللي كنت السبت اللي فات جايبه بتلاتين قرش بقي بخمسين قرش ......يرحم أيام زمان

ودول بيقولوا نسحب الجنسيه من الحضري

بيتهيألي في ناس أولي

ما علينا

مش عارف ليه حاسس ان انا داخل لجنة امتحان شفوي و مع اغتت دكتور في الكليه حاسس اني أول مره أكتب عالبلوج وان الناس هتقول ايه الهبل ده ....ده أساسا لو حد عبرني و قراه

جايز علشان بقالي كتيييييييييييييييييييييييييير بدخل عالبلوج واقرا اللي الناس كاتباه وأخاف ارد ..ساعات بحس بقبقي حاسس اني غريب علي عالم المدونات مشيها مدونات ..... شفتوا ان أنا خلبوص عارف ان اسمها مدونه وهاريكوا بلوج بلوج علشان ابينلكوا اني مثقف وعارف اسمها عربي وانجليزي مع اني كنت ناوي اسميها فتكات علي اسم بنت البواب

ماعلينا ..............أنا كنت ناوي اكتب عن حاجات كتير واقول كلام كبير بس علي رأي عم صلاح جاهين

ساعات افوق ويحل عني غبايا

و احس اني فهمت كل الخبايا

واقوم علشان اكتبب الدرر

الاقيني بكتب حبة غزل في الصبايا

صحيح مصر خدت الكاس و اللعيبه خدوا مكافأت بالألوفات -اللهم لاحسد- بس أنا لسه معايش فلوس اصلح عربيتي و علي رأي سوسه

إزازة الزيت بقت ب 9 جنيه
!!!!!!!!!!!!!!!!!!!!!!!!
اللهم لا اعتراض

و صحيح الفلسطنين دخلوا سينا و ياعالم اسرائيل ناويلنا علي خازوق عامل ازاي .....نرجع ونقول ما علينا

و صحيح ان حجر التفاح غلي علشان المعسل كله راح رفح .....أه والله حتي اسألوا هواري

وصحيح ان انا شيست العربيه .......أه والله حتي اسألو كرم العفشجي

و صحيح ان فاضلي ترم وأخلص من المدعوقه هندسة حلوان .ادعولي بس لحسن دي مش أكيد

بعد كل هذه الحقائق المشكوك في صحتها - حقائق و مشكوك في صحتها - ايوه زي رقاصه و بترقص دي نظريه علميه معروفه المهم .....ماااااااعلينا اكتشفت خير اللهم اجعله خير اني كنت في بيات شتوي أو للدقه كنت في قهاو شتوي حيث أن بيات جايه من بيت يبقي اكيد قهاو جايه من قهوه اكتشفت ان انا ما عملتش اي حاجه مفيده في حياتي من ساعه ما خلصت امتحانات الترم الأول و تقريبا الدكتور المشرف عالمشروع بتاعي هيعمل اعلان خرج ولم يعد ....جروب مشروع تايه ياولاد الحلال

برضو نرجع و نقول مااااااااااااااااا علينا

انا كنت ناوي اقول كلام كبير كبير لكن كالعاده هاقول ان البلوج وحشني وان الناس اللي بتعدي و ترمي سلام هما كمان وحشوني نحب نرحب بالأصدقاء الجدد و كل اللي جه وهنانا ونخص بالذكر

الأنسه نوران

الأنسه ساسو

الاستاذ سويدي

مدام أحلام

سوسه المفروسه

الأنسه ندي

أحب اقولكوا بجد وحشتونييييييييييييييييييييييييييييييييييييييييييييييييييييييييييييييييييييييييي

الدكشنري و لامؤاخذه

خازوق : كلمه عربيه فصحي و في فصل كامل في ميانيكا عن الخوازييق ربنا ما يوريكوا

هواري : كيد القهوجي اللي شغال في المقر الدائم بتاعي المسم بالقهوه

شيست العربيه : يعني لوحت الشاسيه بتاع العربيه بلغه اخوانا الميكانيكيه

كرم : العفشجي اللي كان هايبوس ايدي علشان اصلح العربيه قبل ما تنتحر

هندسة حلوان : أرض العذاب و الضنا

أما بخصوص ما علينا فهي لازمه عندي علطول بقولها وكانت ترد عليا وتقولي انت تعرفه افولها هو مين تقولي دكتور ما علينا من فيلم سيداتي أنساتي

بي اس مهم :احب اهديلكوا الموضوع ده بمناسبه الفالانتاين داي تقروه وده منعا لتكرار المواضيع

أما بقي بمناسبة ان بلوجتي الحبيبة تمت عامها التاني أحب أقول لكل مستمعينا ...أقصد قارئينا كل سنه و انتوا طيبين...................... واسيبكوا مع أغنيه ودع هواك

No Comment

انقذ حياة بطه بريئه واتبرع ولو بكومنت تعاطفك لوحده مو كفايه ............ نور دوت بلوج سبوت مش هانقدر نغلس عليك

بي اس : تصدقوا ان انا من ساعه ماكتبت اول بوسط لغايه دلوقتي مكتبتش غير تمانيه واربعين بوسط و جالي فيهم 499 كومنت يعني بمعدل 10.39 كومنت في البوسط طيب انا راضي ذمتكوا ده يصح ..............لأ لأ أنا زعلان

لن أُنافق

نافِقْ
ونافِقْ
ثمَّ نافِقْ ، ثمَّ نافِقْ .
لا يَسلَمُ الجسدُ النحيلُ من الأذى
إنْ لم تُنافِقْ .
نافِقْ
فماذا في النفاقِ
إذا كَذَبْتَ وأنتَ صادِقْ؟
نافِقْ
فإنَّ الجهلَ أن تَهوي
ليرقى فوقَ جُثَّتِكَ المنافِقْ
لكَ مَبدأٌ ؟ لا تَبْتَئِسْ
كُنْ ثابتاً
لكنْ .. بمختلَفِ المناطِقْ !
واسبِقْ سِواكَ بكلِّ سابِقَةٍ
فإنَّ الحُكْمَ محجوزٌ
لأربابِ السوابِقْ

لافتات-أحمد مطر